கணவன் கண் எதிரே கார் மோதி பெண் பலி

உளுந்தூர்பேட்டை

சென்னை சாலிகிராமம் பகுதியை சேர்ந்தவர் பாலமுருகன்(வயது 57). இவரது மனைவி செண்பகவல்லி(43). இவர்கள் இருவரும் சென்னையில் இருந்து இருசக்கர வாகனத்தில் கடலூர் மாவட்டம் வேப்பூரில் உள்ள உறவினர் வீட்டுக்கு வந்தனர். பின்னர் அங்கிருந்து இருவரும் நேற்று இருசக்கர வாகனத்தில் சென்னைக்கு புறப்பட்டு சென்று கொண்டிருந்தனர்.

உளுந்தூர்பேட்டை புற வழிச்சாலையில் தனியார் பால் பண்ணை அருகே வந்தபோது பின்னால் அதிவேகமாக வந்த கார் பாலமுருகன் ஓட்டி வந்த இருசக்கர வாகனத்தின் மீது மோதியது. இதில் படுகாயம் அடைந்த செண்பகவல்லி சம்பவ இடத்திலேயே துடி துடித்து பரிதாபமாக இறந்தார். படு காயத்துடன் உயிர் தப்பிய பாலமுருகன் தனது கண் எதிரே மனைவி துடிதுடித்து பலியானதை பார்த்து கதறி அழுதார். இந்த விபத்து பற்றிய தகவல் அறிந்து வந்த உளுந்தூர்பேட்டை போலீசார் படுகாயம் அடைந்த பாலமுருகனை சிகிச்சைக்காக உளுந்தூர்பேட்டை அரசு ஆஸ்பத்திரிக்கு அனுப்பி வைத்தனர். மேலும் செண்பகவல்லியின் உடலை கைப்பற்றி பிரேத பரிசோதனைக்காக கள்ளக்குறிச்சி அரசு ஆஸ்பத்திரிக்கு அனுப்பி வைத்தனர். இது குறித்து உளுந்தூர்பேட்டை போலீசார் வழக்குப்பதிவு செய்து விசாரணை நடத்தி வருகின்றனர்.