பிள்ளை பெருமாநல்லூர் ஊராட்சி அலுவலகத்திற்கு புதிய கட்டிடம் கட்டப்படுமா?

பிள்ளைபெருமாநல்லூர் கிராமத்தில் உள்ள ஊராட்சி அலுவலகத்திற்கு புதிய கட்டிடம் கட்டப்படுமா? என அந்த பகுதி பொதுமக்கள் எதிர்பார்த்து உள்ளனர்.

ஊராட்சி அலுவலகம்

மயிலாடுதுறை மாவட்டம் திருக்கடையூர் அருகே பிள்ளைபெருமாநல்லூர் கிராமத்தில் ஊராட்சி மன்ற அலுவலக கட்டிடம் உள்ளது. இந்த கட்டிடம் கட்டப்பட்டு 25 ஆண்டுகள் ஆகிறது. தற்போது கட்டிடம் பழமையாக உள்ளது.

இந்த கட்டிடத்தில் மேற்கூரைகள் மற்றும் சுற்றுசுவர்களில் சிமெண்டு காரைகள் பெயர்ந்து கம்பிகள் வெளியே தெரிகின்றன. மேலும் எந்தநேரத்திலும் இடிந்து விழும் நிலையில் உள்ளது. ஊராட்சி மன்ற அலுவலக கட்டிடத்தில் உள்ள அனைத்து ஆவணங்களும் பாதுகாப்பாக வேறு இடத்தில் மாற்றி வைக்கப்பட்டு சமுதாயக்கூடம் அருகில் உள்ள சேவை மைய கட்டிடத்தில் இயங்கி வருகிறது.

புதிய கட்டிடம்

எனவே பொதுமக்கள் நலன் கருதி பிள்ளை பெருமாநல்லூர் ஊராட்சியில் உள்ள பழமை வாய்ந்த ஊராட்சி மன்ற அலுவலகத்தை இடித்துவிட்டு புதிய ஊராட்சி மன்ற அலுவலகம் கட்ட நடவடிக்கை எடுக்க வேண்டும் என்று அந்த பகுதி பொதுமக்கள் கோரிக்கை விடுத்துள்ளனர்.