திருப்பூர்
அவினாசியில் அசைவ உணவகங்களில் இருந்து அதிக நிறமிகள் சேர்க்கப்பட்ட 22 கிலோ சிக்கனை உணவு பாதுகாப்புத்துறை அதிகாரிகள் பறிமுதல் செய்து அழித்தனர்.
அதிகாரிகள் ஆய்வு
உணவு பாதுகாப்புத்துறை ஆணையாளர் உத்தரவின்படியும், திருப்பூர் மாவட்ட கலெக்டர் வினீத் அறிவுறுத்தலின்படியும், திருப்பூர் மாவட்ட உணவு பாதுகாப்பு துறை நியமன அதிகாரி விஜயலலிதாம்பிகை தலைமையில் உணவு பாதுகாப்பு அலுவலர்கள் குழுவினர் அவினாசி தாலுகா பைபாஸ் ரோடு மற்றும் மங்கலம் ரோட்டில் செயல்பட்டு வரும் அசைவ உணவகங்களில் திடீர் ஆய்வு மேற்கொள்ளப்பட்டது.
அவினாசி சுற்றுவட்டார பகுதிகளில் செயல்பட்டு வரும் அசைவ உணவகங்களில் சேமித்து வைக்கப்படும் குளிர்சாதன பெட்டிகள் முறையாக பராமரிக்கப்படுகிறதா?, சமைத்த அசைவ உணவு குளிர்சாதன பெட்டியில் சேமித்து வைக்கப்படுகிறதா?, காலாவதியான உணவு பொருட்கள் கொண்டு சமைக்கப்படுகிறதா? என்று ஆய்வு செய்யப்பட்டது.
22 கிலோ சிக்கன் பறிமுதல்
இந்த ஆய்வில், அவினாசி பகுதியில் 8 அசைவ உணவகங்களில் ஆய்வு செய்யப்பட்டது. மேலும் 9 பேக்கரிகளிலும் ஆய்வு நடந்தது. குளிர்சாதன பெட்டியில் சமைத்த அசைவ உணவு 9 கிலோ கண்டறியப்பட்டு பறிமுதல் செய்யப்பட்டது. மேலும் சமைத்த சுண்டல் மற்றும் சன்னா மசாலா 3 கிலோ தகாத முறையில் சேமித்து வைத்திருந்ததை பறிமுதல் செய்து அழிக்கப்பட்டது.
அதிக நிறமிகள் சேர்த்து விற்பனைக்கு வைக்கப்பட்டு இருந்த சிக்கன் 22 கிலோ பறிமுதல் செய்து அழிக்கப்பட்டது. மேலும் பரோட்டா மற்றும் சப்பாத்தி தயாரிப்பதற்கு உரிய முறையில் பராமரிக்கப்படாத மாவு 4 கிலோ பறிமுதல் செய்து அழிக்கப்பட்டன. காலாவதியான காளான் பாக்கெட்டுகள் 2 கிலோவும், பழைய காகிதத்தில் வைத்திருந்த வடை, பஜ்ஜி, போண்டா 4 கிலோ பறிமுதல் செய்து அழிக்கப்பட்டது. மொத்தம் இதன் மதிப்பு ரூ.10 ஆயிரம் ஆகும்.
அபராதம் விதிப்பு
மேலும் ஒரு கடையில் தடை செய்யப்பட்ட பிளாஸ்டிக் பைகளில் பொட்டலம் செய்து கொடுத்ததற்காக கடை உரிமையாளருக்கு ரூ.2 ஆயிரம் அபராதம், 4 கடை உரிமையாளர்களுக்கு எச்சரிக்கை அறிவிப்பு நோட்டீஸ் வழங்கப்பட்டுள்ளது. மேலும் அசைவ உணவகங்கள், பேக்கரி உரிமையாளர்களுக்கு அதிகாரிகள் அறிவுரை வழங்கினார்கள். உணவு சார்ந்த கலப்படம், தரம் குறைவு போன்ற புகார்களுக்கு 94440 42322 என்ற எண்ணில் தொடர்பு கொள்ளலாம் என்று அதிகாரிகள் தெரிவித்துள்ளனர்.