தண்டவாள பராமரிப்பு பணியால் ரெயில்கள் பகுதியாக ரத்து

தென்னக ரெயில்வேயில் திருச்சி கோட்டத்துக்கு உட்பட்ட பகுதிகளில் தண்டவாளம் பராமரிப்பு மற்றும் மேம்பாட்டு பணிகள் நடைபெற்று வருகிறது. இந்த பணி வருகிற 31-ந்தேதி வரை நடைபெறும். இதையடுத்து நேற்று குட்ஷெட் பாலப் பகுதியில் உள்ள ரெயில்வே வழித்தடத்தில் ரெயில்வே ஊழியர்கள் பழைய தண்டவாள பாதையை சீரமைத்து வருகின்றனர். இந்த ரெயில்வே வழித்தடத்தை சீரமைக்க நவீன எந்திரத்தை கொண்டு ரெயில்வே ஊழியர்கள் பணியில் ஈடுபட்டு வருகின்றனர். இதனால் ரெயில் சேவையில் மாற்றங்கள் செய்யப்பட்டுள்ளன. அதன்படி திருச்சியில் இருந்து காரைக்காலுக்கு செல்லும் முன்பதிவில்லாத எக்ஸ்பிரஸ் வருகிற 31-ந்தேதி வரை தஞ்சை - காரைக்கால் இடையே பகுதியாக ரத்து செய்யப்படுகிறது. இந்த நாட்களில் அந்த ரெயில் தஞ்சையில் இருந்து காரைக்கால் செல்லாது. இதே போல் திருச்சி வழியாக செல்லும் மயிலாடுதுறை - விழுப்புரம் செல்லும் முன்பதிவு இல்லாத எக்ஸ்பிரஸ் ரெயில், மயிலாடுதுறை - கடலூர் துறைமுகம் இடையே பகுதியாக ரத்து செய்யப்படுகிறது. மேலும் பாலக்காடு டவுனில் இருந்து காலை 6.30 மணிக்கு புறப்பட்டு திருச்சிக்கு வரும் முன்பதிவில்லாத எக்ஸ்பிரஸ் ரெயில், திருச்சி கோட்டை - திருச்சி ஜங்ஷன் இடையே வருகிற 25-ந்தேதி வரை பகுதியாக ரத்து செய்யப்படுகிறது.