பள்ளிகளுக்கு இடையேயான கால்பந்து போட்டியில் திருச்செந்துறை அரசு பள்ளி முதலிடம்

தமிழ்நாடு பள்ளிக்கல்வித்துறை சார்பில் திருச்சி கல்வி மாவட்ட `சி' மண்டலத்திற்கு உட்பட்ட பள்ளிகளுக்கு இடையேயான கால்பந்து போட்டி திருச்சியில் 2 நாட்கள் நடந்தது. 14 வயதுக்கு உட்பட்டோர், 17 வயதுக்கு உட்பட்டோர், 19 வயதுக்கு உட்பட்டோர் பிரிவுகளில் நடந்த இந்த போட்டிகளில் 50 பள்ளிகளை சேர்ந்த அணிகள் கலந்து கொண்டன. நாக்-அவுட் முறையில் நடந்த இந்த போட்டியின் 19 வயதுக்கு உட்பட்ட பிரிவில் இறுதி ஆட்டத்தில் தெப்பக்குளம் பிஷப்ஹீபர் பள்ளியும், செயிண்ட் ஜோசப் பள்ளியும் மோதின. இந்த ஆட்டத்தில் பிஷப்ஹீபர் பள்ளி அணி 4-1 என்ற கோல் கணக்கில் வெற்றி பெற்று சாம்பியன் பட்டத்தை பெற்றது. 17 வயதுக்கு உட்பட்ட பிரிவில் திருச்செந்துறை அரசு பள்ளி 1-0 என்ற கோல் கணக்கில் பிஷப்ஹீபர் பள்ளியை தோற்கடித்து முதலிடத்தை பிடித்தது. இதுபோல் 14 வயதுக்கு உட்பட்ட பிரிவில் இறுதி போட்டியில் செயிண்ட் ஜோசப் பள்ளி 1-0 என்ற கோல் கணக்கில் வெற்றி பெற்று சாம்பியன் பட்டத்தை பெற்றது. முதலிடம் பிடித்த இந்த 3 அணிகளும் மாவட்ட அளவிலான கால்பந்து போட்டியில் விளையாட தகுதி பெற்றன.