புதுப்பேட்டை அருகேகத்தியை காட்டி ரகளையில் ஈடுபட்ட 2 வாலிபர்கள் கைது

கடலூர் மாவட்டம், புதுப்பேட்டை அருகே உள்ள சிறுகிராமம் அரசு மேல்நிலைப்பள்ளியில் படிக்கும் மாணவர் ஒருவரை பார்ப்பதற்காக 2 வாலிபர்கள் வந்துள்ளனர். மதுபோதையில் இருந்த அவர்கள் கையில் கத்தியுடன் மோட்டார் சைக்கிளில் ஊருக்குள் வேகமாக சென்று பொதுமக்கள் மற்றும் மாணவர்களை அச்சுறுத்தும் வகையில் ரகளையில் ஈடுபட்டனர்.

இதையடுத்து இருவரையும் கிராம மக்கள் சுற்றி வளைத்து பிடித்து பிடித்தனர். பின்னர் இதுபற்றி போலீசாருக்கு தகவல் கொடுத்தனர். அதன்பேரில் புதுப்பேட்டை போலீஸ் இன்ஸ்பெக்டர் நந்தகுமார் மற்றும் போலீசார், சம்பவ இடத்திற்கு விரைந்து சென்று பொதுமக்கள் பிடித்து வைத்திருந்த 2 பேரிடம் விசாரணை நடத்தினர்.

விசாரணையில் அவர்கள் கள்ளக்குறிச்சி மாவட்டம், காந்தளவாடி பகுதியை சேர்ந்த தட்சிணாமூர்த்தி மகன் திவான் (வயது 23), தனசேகர் மகன் முருகன் (23) ஆகியோர் என்பதும், இருவரும் சமையல் வேலை செய்பவர்கள் என்பதும் தெரிய வந்தது. இதையடுத்து போலீசார் வழக்குப்பதிவு செய்து திவான், முருகன் உள்பட 2 பேரையும் கைது செய்து விசாரணை நடத்தி வருகின்றனர்.