ஜாமீனில் வந்தவர் கடத்தப்பட்டதாக பரபரப்பு

நெல்லை பேட்டை பகுதியைச் சேர்ந்தவர் மணிகண்டன். இவர் ஒரு வழக்கில் கைதாகி பாளையங்கோட்டை மத்திய சிறையில் அடைக்கப்பட்டு இருந்தார். இந்த நிலையில் நேற்று அவர் ஜாமீனில் சிறையில் இருந்து வெளியே வந்தார். அப்போது அவர் கடத்தி செல்லப்பட்டதாக தகவல் வெளியானது. இதனை அறிந்த குடும்பத்தினர் அதிர்ச்சி அடைந்து போலீசாருக்கு தகவல் தெரிவித்தனர். உடனே மேலப்பாளையம் போலீஸ் உதவி கமிஷனர் சதீஷ்குமார் தலைமையில் போலீசார் விசாரணை நடத்தினார்கள். இதற்கிடையே மணிகண்டன் வீட்டுக்கு வந்து விட்டதாக தகவல் கிடைத்தது. இதுதொடர்பாக போலீசார் சிறை பகுதியில் உள்ள கண்காணிப்பு கேமராக்களில் பதிவான காட்சிகளை ஆய்வு செய்து வருகின்றனர். இந்த சம்பவம் அப்பகுதியில் பரபரப்பை ஏற்படுத்தியது.