மாட்டுத்தாவணி மார்க்கெட்டில் முருங்கைக்காய் விலை கடும் வீழ்ச்சி -ஒரு கிலோ ரூ.40-க்கு விற்பனை

மதுரை மாட்டுத்தாவணி மார்க்கெட்டில் முருங்கைக்காய் விலை கடுமையாக வீழ்ச்சி அடைந்துள்ளது. அதன்படி, ஒரு கிலோ ரூ.40-க்கு விற்பனையானது.

முருங்கைக்காய்

தென் மாவட்டங்களில் மிக முக்கிய மார்க்கெட்டாக, மதுரை மாட்டுத்தாவணி காய்கறி மார்க்கெட் உள்ளது. இங்கு வெளி மாநிலங்கள் மற்றும் வெளி மாவட்டங்களில் இருந்து தினந்தோறும் ஏராளமான லாரிகளில் காய்கறிகள் வருகின்றன. அதன் பின்னர் இங்கிருந்து தென் மாவட்டங்களுக்கு லாரிகள் மூலம் காய்கறிகள் எடுத்துச் செல்லப்படுகிறது. இதுபோல் மதுரையில் உள்ள சில்லறை வியாபாரிகளும் இந்த மார்க்கெட்டுக்கு வந்துதான் தங்களுக்கு தேவையான பொருட்களை வாங்கி செல்கின்றனர்.

இந்தநிலையில், மதுரை மாட்டுத்தாவணி மார்க்கெட்டில் முருங்கைக்காயின் விலை படிப்படியாக வீழ்ச்சி அடைந்துள்ளது. நேற்றைய நிலவரப்படி ஒரு கிலோ முருங்கைக்காய் ரூ.40-க்கு விற்பனையானது.

கடந்த மாதத்தில் முருங்கைக்காயின் விலை ரூ.200-க்கும் அதிகமாக இருந்தது. ஆனால், தற்போது அதன் விலை படிப்படியாக குறைந்து ரூ.40-ஐ தொட்டிருக்கிறது. முருங்கைக்காய் சீசன் தொடங்கி இருப்பதால் அதன் விலை குறைந்துள்ளதாக வியாபாரிகள் தெரிவிக்கின்றனர்.

இதுகுறித்து அவர்கள் மேலும் கூறியதாவது:-

சீசன் தொடங்கியது

முருங்கைக்காய் சீசனானது, கடந்த மாதமே தொடங்கி இருக்க வேண்டும். ஆனால், தற்போது காலதாமதமாக தொடங்கி இருக்கிறது. மாட்டுத்தாவணி மார்க்கெட்டுக்கு திருச்செந்தூர், உடன்குடி, திசையன்விளை, விளாத்திகுளம், ஒட்டன்சத்திரம், ஆண்டிப்பட்டி, உசிலம்பட்டி, வலையப்பட்டி போன்ற இடங்களில் இருந்தும், குஜராத், மும்பை போன்ற வெளி மாநிலங்களில் இருந்தும் சீசனை பொறுத்து தினமும் 15 டன் முதல் 20 டன் வரை முருங்கைக்காய் விற்பனைக்காக வருகின்றன. சீசன் இல்லாத சமயத்தில், ஒரு கிலோ முருங்கைக்காய் ரூ.400 வரை விற்பனையாகும். தற்போது வரத்து அதிகமாக இருப்பதால் விலை குறைந்துள்ளது. வரும் நாட்களில் இன்னும் குறைய வாய்ப்புள்ளது. பொதுவாக மழைக்காலங்களில் முருங்கைக்காய் விலை அதிகரிக்கும் என்றனர்.