மோட்டார் சைக்கிள் விபத்தில் காயமடைந்த ஆசிரியை சாவு

பேரணாம்பட்டு அடுத்த பாலூர் பகுதியை சேர்ந்தவர் தாமோதரன். இவரது மனைவி தனலட்சுமி (வயது 54). இவர் ஆம்பூர் பைபாஸ் சாலை அருகே உள்ள அரசு நிதி உதவி பெறும் மேல்நிலை பள்ளியில் ஆசிரியையாக பணியாற்றி வந்தார். கடந்த சில நாட்களுக்கு முன்பு ஆம்பூர் அடுத்த துத்திபட்டு பகுதியில் மோட்டார் சைக்கிளில் கணவருடன் சென்று கொண்டிருந்த போது திடீரென மோட்டார் சைக்கிள் விபத்துக்குள்ளானது. இதில் தனலட்சுமிக்கு தலையில் பலத்த காயம் ஏற்பட்டது.

உடனடியாக அவரை வேலூரில் உள்ள தனியார் மருத்துவமனையில் சேர்த்தனர். அங்கு சிகிச்சை பெற்று வந்த அவர் நேற்று சிகிச்சை பலனின்றி பரிதாபமாக உயிரிழந்தார். இது குறித்து உமராபாத் போலீசார் விசாரணை நடத்தி வருகின்றனர்.