மாநில அளவிலான வினாடி-வினா போட்டிக்கு 4 மாணவர்கள் தேர்வு

சிவகங்கை மாவட்ட முதன்மை கல்வி அலுவலர் சுவாமிநாதன் விடுத்துள்ள செய்திக்குறிப்பில் கூறியுள்ளதாவது:-

தமிழக சட்டசபையில் மானிய கோரிக்கையில் பள்ளி கல்வித்துறை அமைச்சர் பேசியபோது பள்ளிகளில் படிக்கும் மாணவர்களின் செயல்பாடுகளை ஊக்குவிக்க மாணவர் மன்றங்களை புதுப்பித்து சிறப்பாக செயல்பட வழிவகை செய்யப்படும் என்று தெரிவித்தார். இதன் அடிப்படையில் 6 முதல் 9-ம் வகுப்பு வரை படிக்கும் மாணவர்களுக்காக வினாடி வினா போட்டிகள் நடத்தப்பட்டன. இவை ஒன்றிய அளவிலும் பின்னர் மாவட்ட அளவில் நடத்தி முடிக்கப்பட்டு விட்டன. தற்போது மாநில அளவிலான போட்டிகள் வருகிற 3-ந்தேதி முதல் 8-ந்தேதி வரை சென்னையில் நடைபெற உள்ளது. இந்த போட்டிகளில் கலந்து கொள்ள சிவகங்கை மாவட்டம் வெற்றியூர் அரசு மேல்நிலைப்பள்ளியில் 8-ம் வகுப்பு படிக்கும் மாணவி காவியா, 7-ம் வகுப்பு படிக்கும் மாணவர் குகன் ஆகியோரும், சிவகங்கை 48 காலனியில் உள்ள நகராட்சி நடுநிலைப்பள்ளியில் 7-ம் வகுப்பு படிக்கும் மாணவர்கள் பிரித்விராஜ் மற்றும் முகமது இர்பான் ஆகிய 4 பேர் போட்டியில் கலந்து கொள்ள உள்ளனர். இவ்வாறு அதில் கூறியுள்ளார்.