தொடர் விடுமுறை எதிரொலி: ஈரோடு பஸ், ரெயில் நிலையங்களில் அலைமோதிய பயணிகள் கூட்டம்

தொடர் விடுமுறை எதிரொலியா க ஈரோடு பஸ், ரெயில் நிலையங்களில் பயணிகள் கூட்டம் அலைமோதியது.

தொடர் விடுமுறை

ஈரோடு மாவட்டத்தில் பல்வேறு மாவட்டங்களை சேர்ந்த பொதுமக்கள் குடும்பத்தினருடன் தங்கி வேலை பார்த்து வருகின்றனர். பண்டிகை மற்றும் விசேஷ காலங்களில் சொந்த ஊர் சென்று கொண்டாடி வருகின்றனர். இந்த நிலையில் நாளை (திங்கட்கிழமை) ஆயுத பூஜை மற்றும் நாளை மறுநாள் (செவ்வாய்க்கிழமை) விஜயதசமி என்பதால் 2 நாட்கள் விடுமுறை அளிக்கப்பட்டுள்ளது.

மேலும் நேற்றும், இன்றும் (ஞாயிற்றுக்கிழமை) விடுமுறை உள்ளது. இதனால் பள்ளிக்கூடம் மற்றும் கல்லூரி மாணவ-மாணவிகளுக்கு தொடர் விடுமுறை அறிவிக்கப்பட்டுள்ளது. இதன் காரணமாக விடுதிகளில் தங்கி படிக்கும் மாணவ-மாணவிகள் மற்றும் பொதுமக்கள் சொந்த ஊர் செல்வதற்காக நேற்று ஈரோடு ரெயில் நிலையத்தில் குவிந்தனர்.

பயணிகள் கூட்டம்

இதேபோல் வெளி மாவட்டங்களில் இருந்து ஈரோடு மாவட்டத்தில் தங்கி வேலை பார்ப்பவர்களும் சொந்த ஊர் சென்ற வண்ணம் உள்ளனர். இதனால் ஈரோடு ரெயில் நிலையத்தில் எங்கு பார்த்தாலும் பயணிகள் கூட்டம் அதிகமாக இருந்தது. குறிப்பாக தென் மாவட்டங்களுக்கு செல்லும் ரெயில்களில் பயணிகள் கூட்டம் அலைமோதியது.

முன்பதிவு செய்யாத பயணிகள் பொது பெட்டிகளில் இடம்பிடிக்க போட்டி போட்டதையும் பார்க்க முடிந்தது. இதேபோல் வெளியூர் செல்லும் பொதுமக்கள் சிரமமின்றி செல்லும் வகையில் ஈரோடு அரசு போக்குவரத்து கழகம் சார்பில் 52 சிறப்பு பஸ்களும் நேற்று முன்தினம் இரவு முதல் இயக்கப்பட்டு வருகின்றன. இதனால் ஈரோடு பஸ் நிலையத்திலும் நேற்று பயணிகள் கூட்டம் அலைமோதியது.