குடிநீர் கேட்டு பொதுமக்கள் சாலை மறியல்

பல்லடம்

பல்லடத்தில், குடிநீர் கேட்டு பொதுமக்கள் சாலை மறியல். பல்லடம் - செட்டிபாளையம் ரோட்டில் உள்ள பனிக்கம்பட்டி ஊராட்சி பகுதியில், குடியிருப்பு பகுதி உள்ளது இதில் சுமார் 50க்கும் மேற்பட்ட குடும்பங்கள் வசித்து வருகின்றனர். இந்த நிலையில் அடிப்படை வசதிகளான தெருவிளக்கு, கழிவுநீர் கால்வாய், குடிநீர் குழாய் இணைப்பு ஆகியவை வழங்கப்படவில்லை என கூறப்படுகிறது.இந்த நிலையில் முறையான குடிநீர் வசதி வழங்க கோரி குடியிருப்புவாசிகள் நேற்று பல்லடம் - செட்டிபாளையம் சாலையில் திடீர் சாலை மறியல் போராட்டத்தில் ஈடுபட்டனர். தகவலறிந்து சம்பவ இடம் வந்த பல்லடம் போலீசார் பொதுமக்களிடம் பேச்சுவார்த்தை நடத்தினர்.இதற்கிடையே பல்லடம் வட்டார வளர்ச்சி அலுவலர் வில்சன், மற்றும் அதிகாரிகள் சம்பவ இடத்திற்கு வந்தனர். அந்தப்பகுதிக்கு ஜல் சக்தி அபியான் திட்டத்தில், குடிநீர் வழங்க திட்டம் செயல்படுத்தப்பட்டு வருகிறது. இன்னும் ஓரிரு மாதத்தில் அனைத்து வீடுகளுக்கும் குடிநீர் வழங்க நடவடிக்கை எடுக்கப்படும் என அதிகாரிகள் தெரிவித்ததை அடுத்து பொதுமக்கள் சமாதானம் அடைந்து கலைந்து சென்றனர் இதனால் பல்லடம் செட்டிபாளையம் ரோட்டில் சுமார் 20 நிமிடம் போக்குவரத்து பாதித்தது.