கோத்தகிரியில் சிவன் கோவில்களில் பிரதோஷ வழிபாடு

கோத்தகிரி

மஹா சிவராத்திரி சனிப் பிரதோஷ நாளான நேற்று கோத்தகிரி கடைவீதி மாரியம்மன் கோவில் வளாகத்தில் உள்ள லிங்கேஸ்வரருக்கு மாலை 4.30 மணி முதல் 6.30 மணி வரை பால், தேன், தயிர், சந்தனம், பன்னீர், திருநீறு மற்றும் பஞ்சாமிர்தத்தால் அபிஷேகம் செய்து வில்வம், அரளி, தாமரை, மல்லிகை மலர்களால் அர்ச்சனை செய்த பின் அபிஷேக பூஜை மற்றும் தீபாராதனை நடைபெற்றது.

மேலும் சிவபெருமானின் வாகனமான நந்தி தேவருக்கும் அபிஷேகம் செய்யப்பட்டு, எண்ணெய், பால், தயிர், சந்தனம், இளநீர் போன்றவற்றால் அபிஷேகம் செய்யப்பட்டது. பின்னர் அருகம்புல் சாற்றி மலர்களால் அலங்காரம் செய்யப்பட்டு, அர்ச்சனை மற்றும் தீபாராதனை நடைபெற்றது. பின்னர் பக்தர்கள் அனைவருக்கும் பிரசாதம் வழங்கப்பட்டது. இதே போல கோத்தகிரி சக்திமலை சிவன் கோவிலில் உள்ள லிங்கேஸ்வரருக்கும் பிரதோஷத்தை யொட்டி சிறப்பு பூஜைகள் நடத்தப்பட்டன. இந்த பிரதோஷ நிகழ்ச்சியில் ஏராளமான பக்தர்கள் விரதமிருந்து கலந்துகொண்டு லிங்க வடிவத்தில் காட்சி அளித்த சிவபெருமானை தரிசனம் செய்து வழிபட்டு சென்றனர்.