மோட்டார் சைக்கிள் மீது கார் மோதி முதியவர் சாவு

பனவடலிசத்திரம்:

தேவர்குளம் அருகே உள்ள வன்னிக்கோனேந்தலை சேர்ந்தவர் மாடசாமி (வயது 58). இவர் மூணாறு எஸ்டேட்டில் குடும்பத்துடன் வசித்து வந்தார். இவருக்கு செல்லபாப்பா (55) என்ற மனைவியும், முருகராஜ் என்ற மகனும், வனிதா என்ற மகளும் உள்ளனர். இவர் வன்னிக்கோனேந்தலில் புதிதாக வீடு கட்டி வருகிறார். அந்த வீட்டிற்கு மரச்சாமான்கள் வாங்குவதற்காக வன்னிக்கோனேந்தலை அடுத்த மேசியாபுரம் பகுதிக்கு மோட்டார் சைக்கிளில் சென்றார்.

அப்போது நெல்லையில் இருந்து சங்கரன்கோவிலை நோக்கி வந்த கார், அவரது மோட்டார் சைக்கிள் மீது எதிர்பாராதவிதமாக மோதியது. இதில் தூக்கி வீசப்பட்ட மாடசாமி சம்பவ இடத்திலேயே இறந்தார். தகவல் அறிந்ததும் தேவர்குளம் போலீஸ் சப்-இன்ஸ்பெக்டர் முத்துப்பாண்டியன் விரைந்து சென்று மாடசாமி உடலை கைப்பற்றி பிரேத பரிசோதனைக்காக நெல்லை அரசு ஆஸ்பத்திரிக்கு அனுப்பி வைத்தார். மேலும் இதுகுறித்து வழக்குப்பதிவு செய்து விசாரணை நடத்தி வருகிறார்.