மோட்டார் சைக்கிள் மோதி முதியவர் சாவு

ஜெயங்கொண்டம்:

ஜெயங்கொண்டம் அருகே விருத்தாச்சலம் ரோட்டில் உள்ள மகிமைபுரத்தை சேர்ந்தவர் ராமசாமி(வயது 82). கூலித்தொழிலாளி. இவருக்கு நான்கு மகள்கள் உள்ளனர். அவர்களுக்கு திருமணமாகி தங்கள் குடும்பத்துடன் வசித்து வருகின்றனர். இதில் உள்ளூரில் உள்ள தனது மகள் வீட்டில் ராமசாமி வசித்து வந்தார். இந்நிலையில் ஜெயங்கொண்டத்திற்கு வந்த ராமசாமி மீண்டும் ஊருக்கு சைக்கிளில் சென்று கொண்டிருந்தார்.

அப்போது அவரது சைக்கிள் மீது பின்னால் வந்த மோட்டார் சைக்கிள் மோதியது. இதில் தூக்கி வீசப்பட்ட ராமசாமி பலத்த காயமடைந்து மயங்கினார். அருகில் இருந்தவர்கள் அவரை மீட்டு ஜெயங்கொண்டம் அரசு மருத்துவமனையில் சிகிச்சைக்காக சேர்த்தனர். பின்னர் மேல்சிகிச்சைக்காக தஞ்சை மருத்துவக் கல்லூரி மருத்துவமனையில் அனுமதிக்கப்பட்ட அவர், அங்கு சிகிச்சை பலனின்றி நேற்று மதியம் உயிரிழந்தார். இதுகுறித்து அவரது உறவினர் கொளஞ்சி ஜெயங்கொண்டம் போலீசில் அளித்த புகாரின்பேரில் மோட்டார் சைக்கிளை ஓட்டி வந்து விபத்தை ஏற்படுத்தியதாக மலங்கன்குடியிருப்பு பகுதியை சேர்ந்த குமாரின் மகன் தினேஷ்(19) மீது போலீசார் வழக்குப்பதிந்து விசாரித்து வருகின்றனர்.