நிலத்தகராறில் மூதாட்டி மீது தாக்குதல்

ஒரத்தநாடு;

தஞ்சை மாவட்டம் திருவோணத்தை அடுத்துள்ள நம்பிவயல் கிராமத்தை சேர்ந்தவர் செல்லையன் மனைவி செண்பகவள்ளி (வயது70), இவரது குடும்பத்தினருக்கும், அதே ஊரை சேர்ந்த கருப்பையாவின் மகன் தியாகராஜன் (50) என்பவருக்கும் நிலப்பிரச்சினை தொடர்பாக முன்விரோதம் உள்ளது. சம்பவத்தன்று செண்பகவள்ளியின் மகன் பெருமாள் நிலத்தில் கொட்டகை அமைக்கும் பணியில் ஈடுபட்டார். அப்போது அங்கு சென்ற தியாகராஜன், அவரது மனைவி ராஜம், தியாகராஜனின் சகோதரர் சேகர், மதுக்கூர் பகுதியை சேர்ந்த தமிழ்மணி மகன் திவாகர்(22) ஆகியோர் பெருமாளிடம் தகராறு செய்ததாக கூறப்படுகிறது. அப்போது இதை தட்டிக் கேட்ட பெருமாளின் தாய் செண்பகவள்ளியை இவர்கள் 4 பேரும் தாக்கினர். இதில் காயம் அடைந்த செண்பகவள்ளி பட்டுக்கோட்டை அரசு ஆஸ்பத்திரியில் சிகிச்சைக்காக சேர்க்கப்பட்டுள்ளார். இது குறித்து செண்பகவள்ளி கொடுத்த புகாரின் பேரில் திருவோணம் போலீசார் வழக்குப்பதிவு செய்து தியாகராஜன், திவாகர் ஆகிய இருவரையும் கைது செய்தனர். மேலும் சேகர், ராஜம் ஆகிய இருவரையும் தேடி வருகின்றனர்.