தமிழகத்தில் பொதுமக்களுக்கு எந்தவித பாதுகாப்பும் இல்லை- அண்ணாமலை குற்றச்சாட்டு

சென்னை,

பாஜக மாநில தலைவர் அண்ணாமலை வெளியிட்டுள்ள அறிக்கையில் கூறப்பட்டிருப்பதாவது:-

விழுப்புரத்தில் முதல்-அமைச்சர் மு.க.ஸ்டாலின் படம் பொறித்த பனியன் அணிந்த திமுக ரவுடிகள், பட்டப்பகலில் சூப்பர் மார்க்கெட்டில் புகுந்து இப்ராஹிம் ராஜா என்பவரை கத்தியால் குத்திக் கொலை செய்துள்ளனர்.

இன்னொரு கடையிலும் பொதுமக்கள் மீது தாக்குதல் நடத்தியிருக்கின்றனர். ஆனால், சட்டபேரவையில் குடும்பச் சண்டை என்று முதல்-அமைச்சர் விளக்கம் கொடுத்திருக்கிறார். குற்றவாளிகள் மீது மேல் நடவடிக்கை எடுக்காமல், ஒவ்வொரு குற்றச்சம்பவங்களும், குடும்பச் சண்டை என்ற அளவில் குறைத்துக் காட்டப்பட்டு வருகிறது.

ஆட்சியில் உள்ள மிதப்பில் தொடர்ந்து திமுகவினர் ஈடுபடும் கொலை உள்ளிட்ட குற்றங்களை குடும்பச்சண்டை என்று முதல்-அமைச்சர் கடந்து செல்ல முடியாது. பொதுமக்களுக்கு எந்தவிதப் பாதுகாப்புமில்லாமல், சீர்குலைந்து கிடக்கும் சட்டம் ஒழுங்கில் கவனம் செலுத்த வேண்டும். மேலும், கட்டுப்பாடின்றி அராஜகங்கள் செய்து வரும் திமுக கட்சிக்காரர்களைக் கட்டுப்படுத்தியும் வைக்க வேண்டும்.

இவ்வாறு அதில் கூறப்பட்டுள்ளது.