நெல்லை: துபாயில் இருந்து கடத்தி வந்த 1 கிலோ தங்கம் பறிமுதல் - 4 பேர் கைது

வள்ளியூர்,

நெல்லை மாவட்டம், நாங்குநேரி போலீஸ் இன்ஸ்பெக்டர் செல்வி மற்றும் போலீசார் நாங்குனேரி டோல்கேட் பகுதியில் வாகன சோதனையில் ஈடுபட்டிருந்தனர். அப்போது வேகமாக வந்த ஒரு காரை நிறுத்தி சோதனையிட்டனர். அப்போது அவர்களிடம் கேட்ட கேள்விகளுக்கு முன்னுக்கு பின் முரணாக பேசியதால் சந்தேகம் அடைந்த போலீசார் தீவிர விசாரணை மேற்கொண்டனர்.

அப்போது, காரில் இருந்த அலாவுதீன் தனது ஆசன வாய் பகுதியில் சுமார் 50 லட்சம் மதிப்பிலான ஒரு கிலோ தங்கத்தை மறைத்து வைத்து எடுத்து வந்திருப்பது தெரிய வந்தது. இதனை அடுத்து அவரிடமிருந்த பாஸ்போர்ட்டையும் அவர்கள் வந்த காரையும் பறிமுதல் செய்தனர்.

அதன் பேரில் காரில் இருந்த அலாவுதீன் (வயது 39), வீரபுத்திரன் (40), செந்தில்குமார் (36), பிரவீன் சார்லஸ் (32) 4 பேரையும் கைது செய்த போலீசார் அவர்களை திருச்சி சுங்கத்துறை அதிகாரிகளிடம் ஒப்படைத்தனர். துபாயிலிருந்து திருவனந்தபுரம் விமானநிலையம் வழியாக இந்தியாவுக்கு வரும்போது தங்கத்தை கடத்தி வந்துள்ளது தெரிய வந்தது.

திருவனந்தபுரம் விமான நிலையத்தில் மத்திய பாதுகாப்பு படையில் கடுமையான பாதுகாப்புகளையும் மீறி தங்க கடத்தல் நடந்தது அதிர்ச்சி அளிப்பதாக சுங்கத்துறை வட்டாரங்கள் தெரிவிக்கின்றன. மேலும் இந்த கும்பலில் வேறுயாருக்கும் தொடர்பு உள்ளதா என்பது குறித்தும் விசாரணை நடந்து வருகிறது . துபாயில் இருந்து கடத்தி வரப்பட்ட தங்கம் நாங்குநேரியில் பிடிபட்டதால் அப்பகுதியில் பெரும் பரபரப்பை ஏற்படுத்தியது.