கடம்பூர் அருகே 108 ஆம்புலன்சில் குழந்தை பெற்ற பெண்

டி.என்.பாளையம்

டி.என்.பாளையத்தை அடுத்த கடம்பூர் அருகே உள்ள குன்றி மலைக்கிராம பகுதியை சேர்ந்தவர் சாலமன். அவருடைய மனைவி மேரிஸ் ஸ்டெல்லா (வயது 23). இவர் நிறைமாத கர்ப்பிணியாக இருந்தார். இந்த நிலையில் நேற்று காலை மேரிஸ் ஸ்டெல்லாவுக்கு பிரசவ வலி ஏற்பட்டு உள்ளது. உடனே உறவினர்கள் கடம்பூரில் இருந்து 108 ஆம்புலன்சை வரவழைத்தனர்.

பின்னர் மேரிஸ் ஸ்டெல்லாவை அதில் ஏற்றி கடம்பூர் அரசு ஆரம்ப சுகாதார நிலையத்துக்கு அழைத்து சென்றுள்ளனர். அதன்பின்னர் அங்கிருந்து 108 ஆம்புலன்சில் ஏற்றி சத்தியமங்கலம் அரசு ஆஸ்பத்திரிக்கு புறப்பட்டனர்.

கடம்பூர் அருகே கொடிவேரி நால்ரோடு சென்றபோது ஆம்புலன்சில் இருந்த மேரிஸ் ஸ்டெல்லாவுக்கு பிரசவ வலி அதிகமாகியுள்ளது. உடனே 108 ஆம்புலன்சை அதன் டிரைவர் நிறுத்தினார். பின்னர் அதில் இருந்த மருத்துவ உதவியாளர் குமரேசன், டிரைவர் ராஜ்குமார் ஆகியோர் பிரசவம் பார்த்தனர். இதில் மேரிஸ் ஸ்டெல்லாவுக்கு ஆண் குழந்தை பிறந்தது. இதைத்தொடர்ந்து மேல்சிகிச்சைக்காக தாயையும், சேயையும், 108 ஆம்புலன்ஸ் மூலம் சத்தியமங்கலம் அரசு ஆஸ்பத்திரியில் சேர்த்தனர்.