மார்க்கெட் கட்டுமான பணிகள் விரைவில் தொடக்கம்

பாளையங்கோட்டை காந்தி மார்க்கெட் கட்டுமான பணிகள் விரைவில் தொடங்கப்பட உள்ளது.

ஸ்மார்ட் சிட்டி திட்டம்

நெல்லை மாநகர பகுதிகளில் ஸ்மார்ட் சிட்டி திட்டத்தின் கீழ் புதிய பஸ் நிலையம், நேருஜி கலையரங்கம், வ.உ.சி. மைதானம் உள்ளிட்டவை புதிதாக கட்டப்பட்டு திறக்கப்பட்டது.

இதுதவிர நவீன பஸ் நிறுத்தங்கள், பிரதான சாலைகளில் நவீன மின் விளக்குகள், வழிகாட்டி பலகைகள் உள்ளிட்ட சீரமைப்பு பணிகளும் மேற் கொள்ளப்பட்டுள்ளன. தொடர்ந்து நெல்லை டவுன் எஸ்.என். ஹைரோட்டில் அமைந்துள்ள பொருட்காட்சி மைதானத்தில் நவீன தரத்தில் வர்த்தக மையம், டவுன் போஸ் மார்க்கெட் புதிதாக கட்டுதல் ஆகிய பணிகள் நடந்து வருகின்றன.

காந்தி மார்க்கெட்

இதன் தொடர்ச்சியாக, 60 ஆண்டுகள் பழமையான பாளையங்கோட்டை காந்தி மார்க்கெட் கட்டிடங்கள் மிகவும் பழுதாகி விட்டதாலும், போதிய இடவசதியின்றி நெரிசலாக இருப்பதாலும் அதையும் முழுமையாக இடித்துவிட்டு நவீன வசதிகளுடன் கட்ட மாநகராட்சி திட்டமிட்டது.

இதற்காக ரூ.14 கோடியே 90 லட்சம் மதிப்பில் திட்டமிடப்பட்டு பணிகள் தொடங்கிய நிலையில் மார்க்கெட் வியாபாரிகள் தங்களுக்கு மாற்று இடம் ஒதுக்கிய பின்னரே காலி செய்ய முடியும் என அறிவித்தனர்.

புதுப்பிக்கும் பணி

இதைத்தொடர்ந்து வியாபாரிகளுடன் நிர்வாக தரப்பில் நடந்த பல்வேறு கட்ட பேச்சுவார்த்தைகளுக்கு பின்னர் தற்போது மார்க்கெட் கட்டிடம் புதுப்பிப்பதற்கான பணிகளை மாநகராட்சி மீண்டும் துரிதப்படுத்தியுள்ளது.

இதற்காக வியாபாரிகளுக்கு தற்காலிக மாற்று ஏற்பாடாக அருகே உள்ள ஜவஹர் மைதானம் பகுதியிலும், பழைய காவலர் குடியிருப்பு மைதானத்திலும் தற்காலிக கடைகள் கட்டப்பட்டு படிப்படியாக அங்கு கடைகள் மாற்றப்பட்டு வருகின்றன.

இதன் தொடர்ச்சியாக மாநகராட்சி சார்பில் ஏற்கனவே அமைக்கப்பட்டிருந்த மார்க்கெட் கட்டிடம் பகுதி பகுதியாக இடிக்கப்பட்டு வருகிறது. அந்த பணிகள் 90 சதவீதத்தை எட்டிவிட்டது. அங்கிருந்து வெளியேற்றப்படும் கட்டிட கழிவுகள் மாநகர பகுதியில் உள்ள தாழ்வான தெருக்களிலும் தேவைக்கேற்ப எடுத்து செல்லப்பட்டு கொட்டப்படுகிறது.

குளிர்சாதன வசதி

புதிதாக கட்டப்படும் மார்க்கெட்டில் 50 டன் வரையில் காய்கறிகள், பழங்களை பதப்படுத்தும் குளிர்சாதன வசதி கொண்ட குடோன்கள் அமைக்கப்பட உள்ளன. இதில் மார்க்கெட் வியாபாரிகள் தினமும் வியாபாரம் செய்துவிட்டு விற்காமல் மீதம் இருக்கும் காய்கறிகள், பழங்களை பாதுகாத்து விற்பனைக்கு பயன்படுத்த முடியும். மொத்தம் 3 ஆயிரத்து 877 சதுர மீட்டர் அளவில் தரைதளத்தில் புதிய மார்க்கெட் கட்டிடம் அமைக்கப்படுகிறது. தரைத்தளத்தில் 172 கடைகள் அமைக்கப்படுகின்றன. கீழ்த்தள பகுதியில் 3 ஆயிரத்து 553 சதுர மீட்டரில் 27 நான்கு சக்கர வாகனங்கள், 819 இரு சக்கர வாகனங்கள் நிறுத்தும் (பார்க்கிங் செய்யும்) அளவிற்கு புதிய மார்க்கெட் கட்டிடம் கட்டப்பட உள்ளது. இதையொட்டி கட்டுமான பணிகள் விரைவில் தொடங்கப்பட உள்ளது.