கூடலூர் அருகே லாட்டரி சீட்டுகள் விற்றவர் கைது

கூடலூர் அருகே லோயர்கேம்ப் போலீஸ் சப்-இன்ஸ்பெக்டர் மூவேந்தன் தலைமையிலான போலீசார் ரோந்து பணியில் ஈடுபட்டிருந்தனர். அப்போது லோயர்கேம்ப் பஸ் நிறுத்தம் பகுதியில் கையில் துணிப்பையுடன் சந்தேகப்படும் வகையில் ஒருவர் நின்று கொண்டிருந்தார். இதனால் அவரை பிடித்து போலீசார் விசாரணை நடத்தினர். அப்போது அவர் முன்னுக்குப்பின் முரணாக பதில் அளித்தார்.

இதனால் சந்தேகம் அடைந்த போலீசார், அவர் வைத்திருந்த பையை சோதனை செய்தனர். அதனுள் லாட்டரி சீட்டுகள் கட்டுக்கட்டாக இருந்தன. மேலும் விசாரணையில் அவர், கம்பம் அருகே உள்ள நாராயனதேவன்பட்டியை சேர்ந்த சரவணன் (வயது 53) என்பதும், லாட்டரி சீட்டுகளை விற்றதும் தெரியவந்தது. இதையடுத்து போலீசார் வழக்குப்பதிவு செய்து சரவணனை கைது செய்தனர். மேலும் அவரிடம் இருந்து 389 லாட்டரி சீட்டுகள் பறிமுதல் செய்யப்பட்டது.