2 வீடுகளில் நகை, பணம் திருட்டு

குத்தாலம்:

குத்தாலம் அருகே 2 வீடுகளில் நகை, பணத்தை மர்ம நபர்கள் திருடி சென்றனர். இதுதொடர்பாக போலீசார் விசாரணை நடத்தி வருகின்றனர்.

6¼ பவுன் நகை திருட்டு

மயிலாடுதுறை மாவட்டம் குத்தாலம் அருகே மறையூர் தாமரைக்குளம் தெருவை சேர்ந்தவர் கணபதி (வயது59). விவசாயி. இவர் தனது வீட்டின் அருகே ஒரு அறை கட்டி, அதில் பீரோ உள்ளிட்ட பொருட்களை வைத்திருந்தார்.

இந்த நிலையில் நேற்று முன்தினம் இரவு கணபதி வீட்டில் அனைவரும் தூங்கி கொண்டிருந்தனர். அப்போது அவரது வீட்டின் பக்கத்தில் உள்ள அறைக்குள் புகுந்த மர்ம நபர்கள், உள்ளே இருந்த பீரோவை உடைத்து, அதில் இருந்த 6¼ பவுன் நகைகள் மற்றும் ரூ.1 லட்சத்தை திருடி சென்றனர்.

மற்றொரு சம்பவம்

இதேபோல அதே ஊரில் உள்ள பெருமாள் கோவில் தெருவை சேர்ந்தவர் கோவிந்தராஜன். இவர் வெளிநாட்டில் வேலை பார்த்து வருகிறது. இவருடைய மனைவி கோகிலா (வயது45). இவர் சென்னையில் உள்ள தனியார் ஆஸ்பத்திரியில் சிகிச்சை பெற கடந்த 23-ந் தேதி வீட்டை பூட்டி விட்டு சென்றுள்ளார்.

வீடு பூட்டிக்கிடப்பதை நோட்டமிட்ட மர்ம நபர்கள் வீட்டின் கதவை உடைத்து உள்ளே புகுந்து 2 பீரோவை உடைத்து அதில் இருந்து ரூ.50 ஆயிரத்தை திருடி சென்றனர்.

போலீசார் விசாரணை

இதுகுறித்து தகவல் அறிந்த மயிலாடுதுறை மாவட்ட துணை போலீஸ் சூப்பிரண்டு சஞ்சீவ்குமார் தலைமையில் குத்தாலம் போலீஸ் இன்ஸ்பெக்டர் அமுதாராணி, தனிப்படை போலீஸ் சப்-இன்ஸ்பெக்டர் இளையராஜா, சிறப்பு சப்-இன்ஸ்பெக்டர் ரமேஷ் மற்றும் போலீசார் சம்பவ இடத்திற்கு சென்று பார்வையிட்டு விசாரணை நடத்தி வருகின்றனர்.

மேலும் தடயவியல் நிபுணர்கள் திருட்டு நடந்த வீடுகளில் இருந்த கைரேகைகளை பதிவு செய்தனர். இதுகுறித்த புகாரின் பேரில் போலீசார் விசாரணை நடத்தி வருகின்றனர்.

பரபரப்பு

குத்தாலம் அருகே 2 வீடுகளில் நகை மற்றும் பணத்தை மர்ம நபர்கள் திருடி சென்ற சம்பவம் அந்த பகுதி மக்களிடையே பரபரப்பை ஏற்படுத்தி உள்ளது.