ஜல்லிக்கட்டு காளை முட்டி படுகாயம் அடைந்த வாலிபர் பலி

அரியலூர் மாவட்டம் திருமானூர் ஒன்றியத்துக்குட்பட்ட கள்ளூர் கிராமத்தில் கடந்த சில நாட்களுக்கு முன்பு ஜல்லிக்கட்டு நடைபெற்றது. அதனைப் பார்க்க சென்ற வெங்கனூர் கிராமத்தை சேர்ந்த தமிழரசு என்பவரின் மகன் கவியரசு (வயது 22) தனது நண்பர்களான பாலாஜி, தினேஷ், அஜித்குமார் ஆகியோருடன் சென்றுள்ளார். அப்போது வாடி வாசலில் இருந்து சீறிப்பாய்ந்து சென்ற காளை ஒன்று கவியரசின் இடுப்பில் குத்தி தூக்கி வீசியது. இதில் பலத்த காயம் அடைந்த அவரை அங்கிருந்தவர்கள் மீட்டு 108 ஆம்புலன்ஸ் மூலம் அரியலூர் அரசு மருத்துவமனைக்கு கொண்டு சென்றனர். பின்னர் மேல் சிகிச்சைக்காக தஞ்சை அரசு மருத்துவக்கல்லூரியில் அனுமதிக்கப்பட்டார். அங்கு அவருக்கு டாக்டர்கள் தீவிர சிகிச்சை அளித்தனர். ஆனால் சிகிச்சை பலனின்றி கவியரசு நேற்று பரிதாபமாக இறந்தார். இந்த சம்பவம் குறித்து கீழப்பழுவூர் போலீசார் வழக்குப்பதிவு செய்து விசாரணை நடத்தி வருகின்றனர்.