சுதந்திர தின விழா கொண்டாட்டம்

சேரன்மாதேவி:

நெல்லை மாவட்டத்தில் சுதந்திர தின விழா கொண்டாடப்பட்டது.

சுதந்திர தின விழா

நெல்லை மாவட்டத்தில் பல்வேறு இடங்களில் சுதந்திர தின விழா நேற்று கொண்டாடப்பட்டது. சேரன்மாதேவி சிவந்தி மெட்ரிக் மேல்நிலைப்பள்ளியில் பள்ளி முதல்வர் மரிய ஹெலன் சாந்தி தேசிய கொடியேற்றினார். பள்ளி செயலாளர் காமராஜ் வாழ்த்தி பேசினார். ஜவஹர் சிறப்பு விருந்தினராக கலந்துகொண்டு இனிப்பு வழங்கினார். சுதந்திர தினத்தின் சிறப்புகள் குறித்து மாணவிகள் அனுஷா, இந்து பாலா, அனுஸ்ரீ ஆகியோர் பேசினர். விழாவில் ஆசிரியர்கள், மாணவ-மாணவிகள் கலந்து கொண்டனர்.

நெல்லை தொழிலாளர் துறை ஒருங்கிணைந்த அலுவலக வளாகத்தில் சுதந்திர தின விழா கொண்டாடப்பட்டது. தொழிலாளர் இணை ஆணையர் ஹேமலதா தேசிய கொடியேற்றி மரியாதை செலுத்தினார்.

சேரன்மாதேவி

சேரன்மாதேவி ஆதித்தனார் நகர் நலவாழ்வு சங்கம் சார்பில் நடந்த விழாவுக்கு செயலாளர் டேனியல் தலைமை தாங்கினார். ஐசக் செல்வன் வரவேற்றார். 18-வது வார்டு கவுன்சிலர் தேவி தேசிய கொடியேற்றினார். சிவந்தி மெட்ரிக் பள்ளி முதல்வர் மரிய ஹெலன் சாந்தி சிறப்புரையாற்றினார். இதில் நீலகண்டன், தேவதாஸ், பிரின்ஸ் தேவராஜ், ஜான், ரவி உள்பட பலர் கலந்துகொண்டனர். குழந்தைகளுக்கு பரிசுகள் வழங்கப்பட்டது.

நாங்குநேரி யூனியன்

நாங்குநேரி யூனியன் அலுவலகத்தில் யூனியன் தலைவர் சவுமியா எட்வின் தேசிய கொடி ஏற்றி மரியாதை செலுத்தினார். நிகழ்ச்சியில் துணைத்திட்ட இயக்குனர் சுமதி, யூனியன் ஆணையாளர் கிஷோர்குமார், வட்டார வளர்ச்சி அலுவலர் மங்களம் கோமதி, ஒன்றிய கவுன்சிலர் எஸ்.ஆரோக்கிய எட்வின் மற்றும் யூனியன் கவுன்சிலர்கள், அலுவலர்கள் கலந்து கொண்டனர். பின்னர் சங்கனாங்குளம், செண்பகராமநல்லூர் பஞ்சாயத்து கிராமசபை கூட்டங்களில் சவுமியா எட்வின் கலந்து கொண்டு தொடங்கி வைத்தார். நிகழ்ச்சியில் ஒன்றிய கவுன்சிலர் அகஸ்டின் கீதராஜ் பஞ்சாயத்து தலைவர்கள் எஸ்.சின்னத்தம்பி, முருகம்மாள் ஆகியோர் கலந்து கொண்டனர்.

ராதாபுரம் யூனியன் கரைச்சுத்து உவரி பஞ்சாயத்து, உவரியில் சுதந்திர தின விழா நடைபெற்றது. கரைச்சுத்து உவரி பஞ்சாயத்து தலைவர் கவிதாராஜன் ஊராட்சி மன்ற அலுவலகத்திலும், தபால் நிலையத்திலும் தேசிய கொடியேற்றி மரியாதை செலுத்தினார். நிகழ்ச்சியில் ஊராட்சி துணைத்தலைவர் ஏ.கே.ஏ.ராஜன்கிருபாநிதி உள்பட பலர் கலந்து கொண்டனர்.