சத்தியமங்கலம் மார்க்கெட்டில் கனகாம்பரம் கிலோ ரூ.710-க்கு ஏலம்

சத்தியமங்கலம்

சத்தியமங்கலம் மார்க்கெட்டில் கனகாம்பரம் பூ கிலோ ரூ.710-க்கு ஏலம் போனது. கடந்த 2 நாட்களில் கனகாம்பரம் பூ கிலோவுக்கு 200 ரூபாய் விலை உயர்ந்து உள்ளது.

பூ மார்க்கெட்

சத்தியமங்கலத்தில் உள்ள கரட்டூர் ரோட்டில் பூ மார்க்கெட் செயல்பட்டு வருகிறது. இந்த மார்க்கெட்டில் தினமும் காலை 7 மணி முதல் மாலை 4 மணி வரை பூக்கள் ஏலம் நடைபெறும். அதன்படி நேற்று காலை 7 மணிக்கு பூக்கள் ஏலம் நடைபெற்றது.

இந்த ஏலத்துக்கு சத்தியமங்கலம் மற்றும் அதன் சுற்றுவட்டார பகுதிகளில் இருந்து ஏராளமான விவசாயிகள் 3 டன் பூக்களை விற்பனைக்காக கொண்டு வந்திருந்தனர்.

நேற்றைய ஏலத்தில் மல்லிகைப்பூ கிலோ ஒன்று ரூ.385-க்கும், முல்லை ரூ.200-க்கும், காக்கடா ரூ.350-க்கும், செண்டுமல்லி ரூ.79-க்கும், பட்டுப்பூ ரூ.150-க்கும், கனகாம்பரம் ரூ.710-க்கும், சம்பங்கி ரூ.20-க்கும், அரளி ரூ.100-க்கும், துளசி ரூ.40-க்கும், செவ்வந்தி ரூ.240-க்கும், ஜாதிமல்லி ரூ.500-க்கும் ஏலம் போனது.

2 நாட்களில்...

கனகாம்பரம் பூ நேற்று முன்தினம் கிலோ ஒன்று ரூ.600-க்கும், 16-ந் தேதி கிலோ ஒன்று ரூ.510-க்கும் விற்பனை செய்யப்பட்டது. கடந்த 2 நாட்களில் மட்டும் கனகாம்பரம் பூ கிலோவுக்கு ரூ.200 உயர்ந்து விற்பனை ஆனதால் விவசாயிகள் மகிழ்ச்சி அடைந்தனர்.

இதுகுறித்து மார்க்கெட் சங்க தலைவர் முத்துசாமி, செயலாளர் கிருஷ்ணமூர்த்தி ஆகியோர் கூறுகையில், 'மார்க்கெட்டுக்கு 10 கிலோ கனகாம்பரம் பூ மட்டுமே விற்பனைக்காக கொண்டு வரப்பட்டிருந்தது. கர்நாடக மாநில விவசாயிகளுக்கு கனகாம்பரம் பூ அதிக அளவில் தேவைப்பட்டது. இதனால் வியாபாரிகள் போட்டி போட்டு ஏலம் கேட்டதால் கனகாம்பரம் பூ விலை உயர்ந்து விற்பனை ஆனது,' என்றனர்.