கடலூரில் மண்டல அளவிலான டேக்வாண்டோ போட்டி

சிதம்பரம் அண்ணாமலை பல்கலைக்கழகத்துக்குட்பட்ட கடலூர், மயிலாடுதுறை, விழுப்புரம், கள்ளக்குறிச்சி மண்டலங்களுக்கு இடையே கல்லூரி மாணவ-மாணவிகளுக்கான டேக்வாண்டோ போட்டி கடலூர் அண்ணா விளையாட்டு டேக்வாண்டோ அரங்கத்தில் நடைபெற்றது. இதற்கு கடலூர் பெரியார் அரசு கலைக்கல்லூரி முதல்வர் ஜோதி வெங்கடேஸ்வரன் தலைமை தாங்கினார். உடற்கல்வி இயக்குனர்கள் புவனேஸ்வரி, ஜோதிப்பிரியா, ராஜமாணிக்கம் ஆகியோர் முன்னிலை வகித்தனர். பல்கலைக்கழக உடற்கல்வியியல் துறைத்தலைவர் மற்றும் ஒருங்கிணைப்பாளர் செந்தில் வேலன், மாவட்ட விளையாட்டு அலுவலர் சிவா ஆகியோர் போட்டியை தொடங்கி வைத்தனர். போட்டியில் அண்ணாமலை பல்கலைக்கழகத்துக்குட்பட்ட கல்லூரிகளில் இருந்து வந்திருந்த நூற்றுக்கும் மேற்பட்ட வீரர்கள் மற்றும் வீராங்கனைகள் கலந்து கொண்டு தங்களது திறமைகளை வெளிப்படுத்தினர். இதில் தேர்ந்தெடுக்கப்படும் சிறந்த வீரர்கள் அகில இந்திய பல்கலைக்கழக அளவிலான போட்டிகளில் பங்கேற்க தகுதி பெறுவார்கள். இதில் உடற்கல்வி இயக்குனர்கள் சுரேஷ்குமார், நாராயணசாமி, அசோக்குமார், கடலூர் டேக்வாண்டோ ஸ்போர்ட்ஸ் அசோசியேஷன் தலைவர் ஹரிஹரன், செயலாளர் ஏழுமலை, பொருளாளர் கோபிநாத், டேக்வாண்டோ பயிற்சியாளர் இளவரசன் மற்றும் நடுவர்கள், மாணவ-மாணவிகள் பலர் கலந்து கொண்டனர். இதற்கான ஏற்பாடுகளை உடற்கல்வி இயக்குனர் குமணன் செய்திருந்தார்.