அய்யலூர் சந்தையில் ரூ.2½ கோடிக்கு ஆடுகள் விற்பனை

 பக்ரீத் பண்டிகை

திண்டுக்கல் மாவட்டம் வடமதுரை அருகே உள்ள அய்யலூரில், வியாழக்கிழமைதோறும் ஆடு மற்றும் கோழி சந்தை நடைபெற்று வருகிறது.

மாவட்டத்தில் பிரசித்தி பெற்ற சந்தையான இங்கு திண்டுக்கல் மட்டுமின்றி மதுரை, திருச்சி, கரூர், புதுக்கோட்டை உள்ளிட்ட வெளி மாவட்டங்களை சேர்ந்த வியாபாரிகளும் ஆடு, கோழிகளை மொத்தமாக விலைக்கு வாங்கி செல்வர்.

இந்தநிலையில் வருகிற 29-ந்தேதி (வியாழக்கிழமை) பக்ரீத் பண்டிகை கொண்டாடப்பட உள்ளது. இதையொட்டி குர்பானி கொடுப்பதற்காக, இஸ்லாமியர்கள் அதிக அளவில் ஆடுகளை வாங்குவது வழக்கம்.

செம்மறி ஆடுகள்

அதன்படி நேற்று அய்யலூரில் கூடிய ஆட்டுச்சந்தை களை கட்டியது. அதிகாலை முதலே ஏராளமான வியாபாரிகளும், விவசாயிகளும் சந்தையில் குவிந்தனர். இதனால் சந்தையில் கூட்டம் அலைமோதியது. வியாபாரிகள் போட்டி போட்டுக் கொண்டு ஆடுகளை வாங்கி சென்றனர்.

வெள்ளாடுகளை விட செம்மறி ஆடுகள் விற்பனை சூடு பிடித்தது. முறுக்கு கொம்புகளுடன் கூடிய நல்ல திடகாத்திரமான செம்மறி ஆட்டு கிடாய்கள் ரூ. 40 ஆயிரம் வரை விற்பனையானது.

வியாபாரிகளை கவரும் வகையில், செம்மறி ஆடுகளுக்கு விசேஷ அலங்காரம் செய்து விவசாயிகள் விற்பனைக்கு கொண்டு வந்திருந்தனர். 10 கிலோ எடையுள்ள வெள்ளாடு ரூ.6 ஆயிரத்து 500 முதல் ரூ.7 ஆயிரம் வரை விற்பனை ஆனது. 10 கிலோ எடை கொண்ட செம்மறி ஆடுகள் ரூ.7 ஆயிரத்து 500 வரை விற்பனை செய்யப்பட்டது.

ரூ.2½ கோடிக்கு விற்பனை

இதேபோல் ஒரு கிலோ நாட்டுக்கோழி ரூ.400-க்கு விற்பனையானது. சண்டைக்கு பயன்படும் சேவல்களை வியாபாரிகள் மோதவிட்டு பார்த்து வாங்கி சென்ற காட்சியையும் சந்தையில் பார்க்க முடிந்தது. சண்டை சேவல்கள், அதிகபட்சமாக ரூ.10 ஆயிரம் வரை விற்பனை செய்யப்பட்டன.

பக்ரீத் பண்டிகையையொட்டி அய்யலூர் சந்தையில் ஆடுகள் விற்பனை களை கட்டியதால் விவசாயிகள் மகிழ்ச்சி அடைந்துள்ளனர். இதுகுறித்து வியாபாரிகள் கூறுகையில், பக்ரீத் பண்டிகையை முன்னிட்டு ஆட்டுச்சந்தையில் செம்மறி ஆடுகள் விற்பனை அதிகமாக நடந்தது. நேற்று ஒரு நாளில் மட்டும் ரூ.2½ கோடிக்கு விற்பனை நடந்தது என்று தெரிவித்தனர்.