விநாயகர் சிலைகள் ஊர்வலம்

செங்கம்

செங்கத்தில் விநாயகர் சிலைகள் ஊர்வலம் நடந்தது. அப்போது போலீசாருக்கும், விழா குழுவினருக்கும் தள்ளுமுள்ளு ஏற்பட்டதால் பரபரப்பு ஏற்பட்டது.

விநாயகர் சிலைகள் ஊர்வலம்

செங்கத்தில் விநாயகர் சதுர்த்தி திருவிழா கொண்டாடப்பட்டது. இதையடுத்து இன்று விநாயகர் சிலைகள் ஊர்வலம் நடந்தது.

செங்கம் நகரில் ராஜவீதி, பெருமாள் கோவில் தெரு, சிவன் கோவில் தெரு, தளவாநாயக்கன்பேட்டை, துர்க்கையம்மன் கோவில் தெரு, மேலப்பாளையம், துக்காப்பேட்டை உள்பட பல்வேறு இடங்களில் 23 விநாயகர் சிலைகள் பிரதிஷ்டை செய்யப்பட்டிருந்தது.

இந்த நிலையில் நேற்று போளூர் சாலை, பஜார்வீதி வழியாக செங்கத்தின் முக்கிய வீதிகள் வழியாக அனைத்து விநாயகர் சிலைகளும் மேளதாளங்களுடன் ஊர்வலமாக கொண்டு செல்லப்பட்டது.

டிரோன் கேமரா 

முன்னதாக ஊர்வலம் தொடங்கும் முன் பெருமாள் கோவில் தெரு சந்திப்பில் இந்து முன்னணி கோட்ட பொறுப்பாளர் மகேஷ், பா.ஜ.க. மாவட்ட தலைவர் ஜீவானந்தம், இந்து முன்னணி மாவட்ட பொறுப்பாளர் அருண்குமார், மாநில பா.ஜ.க. நிர்வாகி ஜம்புகுமார் உள்பட இந்து அமைப்பினர் சிறப்புரையாற்றினர்.

இதைத்தொடர்ந்து விநாயகர் சிலை ஊர்வலம் நடைபெற்றது. மாவட்ட போலீஸ் சூப்பிரண்டு கார்த்திகேயன் தலைமையில் ஏராளமான போலீசார் குவிக்கப்பட்டு பாதுகாப்பு பணியில் ஈடுபட்டனர்.

மேலும் டிரோன் கேமரா மூலம் விநாயகர் சதுர்த்தி ஊர்வலம் கண்காணிக்கப்பட்டது.

தள்ளுமுள்ளு

பஜார் வீதியில் மசூதி அருகே விநாயகர் ஊர்வலம் வந்தபோது மேளதாளங்கள் அடிக்க கூடாது என போலீசார் கூறியதால் சிலை அமைப்பு குழுவினருக்கும் போலீசாருக்கும் தள்ளுமுள்ளு மற்றும் வாக்குவாதம் ஏற்பட்டது.

இதைத்தொடர்ந்து பா.ஜ.க. கவுன்சிலர் முரளிதரன் மேளத்தை வாங்கி அவரது கழுத்தில் அணிந்து மசூதி தெருவில் மேளதாளம் முழங்க பின்னர் ஊர்வலம் சென்றது.

இதனால் அங்கு பரபரப்பு ஏற்பட்டது.

செங்கத்தில் விநாயகர் சதுர்த்தி ஊர்வலத்திற்கு மாவட்ட போலீஸ் சூப்பிரண்டு தலைமையில் அதிரடிப்படை உள்பட ஏராளமான போலீசார் குவிக்கப்பட்டு டிரோன் கேமரா மூலம் கண்காணிக்கப்பட்டது இதுவே முதல் முறை என்பது குறிப்பிடத்தக்கது.