தேவதானப்பட்டி அருகே மோட்டார் சைக்கிளில் இருந்து தவறி விழுந்து விவசாயி பலி

கொடைக்கானல் நேதாஜிநகரை சேர்ந்தவர் தங்கராஜ் (வயது 40). விவசாயி. நேற்று முன்தினம் இவர், திருச்சி மாவட்டம் துவரங்குறிச்சியில் உள்ள தனது தந்தையை பார்ப்பதற்காக மோட்டார் சைக்களில் சென்றார். பின்னர் இரவு அங்கிருந்து கொடைக்கானல் நோக்கி திரும்பி வந்து கொண்டிருந்தார்.

வத்தலக்குண்டு-கொடைக்கானல் மலைப்பாதையில் டம்டம் பாறை அருகே தங்கராஜ் சென்று கொண்டிருந்தபோது, திடீரென்று மோட்டார் சைக்கிளில் இருந்து நிலைதடுமாறி கீழே விழுந்தார். இதில், பலத்த காயமடைந்த அவர் மயங்கினார். இதனை பார்த்த அக்கம்பக்கத்தினர் தங்கராஜை மீட்டு சிகிச்சைக்காக வத்தலக்குண்டு அரசு மருத்துவமனைக்கு அனுப்பி வைத்தனர். ஆனால் மருத்துவமனைக்கு செல்லும் வழியிலேயே அவர் உயிரிழந்தார். இதுகுறித்து தேவதானப்பட்டி போலீசார் வழக்குப்பதிவு செய்து விசாரணை நடத்தி வருகின்றனர்.