அட்சயலிங்க சாமி கோவிலில் தீத்தடுப்பு விழிப்புணர்வு நிகழ்ச்சி

சிக்கல்:

கீழ்வேளூரில் பிரசித்தி பெற்ற அட்சயலிங்க சாமி கோவில் உள்ளது. இக்கோவிலில் தீயணைப்பு துறை மற்றும் மீட்பு துறை சார்பில் தீத்தடுப்பு விழிப்புணர்வு நிகழ்ச்சி நடந்தது.

இதில் தீப்பிடித்தால் அதை எப்படி அணைப்பது, தீயின் வகைகள், தீயணைப்பு கருவியை பயன்படுத்தும் விதம், தீ விபத்து ஏற்படும் போது எப்படி நடந்து கொள்வது, தீ விபத்து ஏற்பட்டால் தீயணைப்பு வாகனம் வருவதற்கு முன்பு செய்ய வேண்டிய முன்னெச்சரிக்கை நடவடிக்கைகள் குறித்து கோவிலில் பணிபுரியும் அர்ச்சகர்கள், அலுவலக ஊழியர்களுக்கு செயல் விளக்கம் அளிக்கப்பட்டது. மேலும் கோவிலுக்கு வந்த பக்தர்களிடம் தீ தடுப்பு குறித்த விழிப்புணர்வு துண்டு பிரசுரங்கள் வழங்கப்பட்டது. நிகழ்ச்சியில் கோவில் செயல் அலுவலர் பூமிநாதன், தீயணைப்பு துறை சிறப்பு நிலை அலுவலர் ராஜராஜ சோழன் மற்றும் தீயணைப்பு துறை வீரர்கள், கோவில் பணியாளர்கள் உள்பட பலர் கலந்து கொண்டனர்.