மகளை கத்தியால் வெட்டிய தந்தை கைது

வாணியம்பாடியை அடுத்த கொடையாஞ்சி கிராமத்தைச் சேர்ந்தவர் வீராசாமி (வயது 60), விவசாயி. இவருக்கு 2 மனைவிகள், 2-வது மனைவியின் மகள் சித்ரா (35). இவர் கணவனை பிரிந்து தாய் வீட்டில் வசித்து வருகிறார்.

வீராசாமிக்கு சர்க்கரை நோய் காரணமாக இடது கால் பகுதியில் அறுவை சிகிச்சை செய்யப்பட்டுள்ளது. இந்த நிலையில் சித்ரா அதே ஊரை சேர்ந்த ஒரு நபருடன் பழகி வருவதாக கூறப்படுகிறது. இதனால் குடும்பத்தில் பிரச்சினை இருந்து வந்தது. இது தொடர்பாக நேற்று தந்தைக்கும் மகளுக்கும் தகராறு ஏற்பட்டுள்ளது. இதில் ஆத்திரம் அடைந்த வீராசாமி கத்தியை எடுத்து சித்ராவை இடது கை மற்றும் வலது கால் பகுதியில் வெட்டியதாக கூறப்படுகிறது. இதில் படுகாயம் அடைந்த அவரை அக்கம்பக்கத்தினர் மீட்டு வாணியம்பாடி அரசு மருத்துவமனையில் சிகிச்சைக்காக சேர்த்தனர். பின்னர் மேல் சிகிச்சைக்காக வேலூர் அரசு மருத்துவமனைக்கு அனுப்பி வைக்கப்பட்டார்.

இச்சம்பவம் தொடர்பாக அம்பலூர் போலீசார் வழக்குப்பதிந்து வீராசாமியை கைது செய்து விசாரணை நடத்தி வருகின்றனர்.