வெவ்வேறு இடங்களில் நடந்த விபத்துகளில் 2 மூதாட்டி உள்பட 5 பேர் சாவு

ஈரோடு

வெவ்வேறு இடங்களில் நடந்த விபத்துகளில் 2 மூதாட்டி உள்பட 5 பேர் இறந்தனர்.

சென்னிமலை

சென்னிமலையை அடுத்த வெள்ளோடு அருகே லட்சுமிபுரம் காலனியை சேர்ந்தவர் குருவன். இவர் ஏற்கனவே இறந்து விட்டார். இவருடைய மனைவி சம்பாள் (வயது 60). இவர் கடந்த 2 தினங்களுக்கு முன்பு வெள்ளோடு அருகே மேட்டுப்பாளையம் பஸ் நிறுத்தம் அருகே நடந்து சென்று கொண்டிருந்தார்.

அப்போது அந்த வழியாக வந்த அடையாளம் தெரியாத வாகனம் ஒன்று சம்பாள் மீது மோதிவிட்டு நிற்காமல் சென்றுவிட்டது. இதில் பலத்த காயமடைந்த அவரை அக்கம்பக்கத்தினர் மீட்டு சிகிச்சைக்காக ஈரோடு அரசு ஆஸ்பத்திரியில் சேர்த்தனர். அங்கு அவருக்கு டாக்டர்கள் தீவிர சிகிச்சை அளித்தனர். ஆனால் சிகிச்சை பலனின்றி நேற்று முன்தினம் சம்பாள் பரிதாபமாக இறந்தார். இதுகுறித்து வெள்ளோடு போலீஸ் சப்-இன்ஸ்பெக்டர் மணிவண்ணன் வழக்கு பதிவு செய்து சம்பாள் மீது மோதி விட்டு சென்ற வாகன டிரைவரை தேடி வருகிறார்.

இதேபோல் சென்னிமலையில் உள்ள குமராபுரி 3-வது தெருவை சேர்ந்தவர் சுப்பிரமணி. இவருடைய மனைவி நல்லம்மாள் (வயது 80). இவர் நேற்று காலை தினசரி மார்க்கெட்டில் காய்கறி வாங்கிக்கொண்டு வெள்ளோடு ரோட்டில் வீட்டுக்கு நடந்து வந்து கொண்டிருந்தார். அப்போது அந்த வழியாக வந்த மோட்டார்சைக்கிள் நல்லம்மாள் மீது எதிர்பாராதவிதமாக மோதியது. இதில் அவர் பலத்த காயம் அடைந்தார். விபத்து நடந்ததும் மோட்டார்சைக்கிள் நிற்காமல் அங்கிருந்து சென்றுவிட்டது. பின்னர் அக்கம்பக்கத்தினர் நல்லம்மாளை மீட்டு் சிகிச்சைக்காக சென்னிமலையில் உள்ள ஒரு தனியார் மருத்துவமனையில் சேர்த்தனர். பின்னர் மேல்சிகிச்சைக்காக அங்கிருந்து ஈரோடு அரசு ஆஸ்பத்திரிக்கு புறப்பட்டு் சென்று கொண்டிருந்தனர். ஆனால் செல்லும் வழியிலேயே நல்லம்மாள் பரிதாபமாக இறந்தார்.

இதுகுறித்து சென்னிமலை போலீஸ் சப்- இன்ஸ்பெக்டர் உமாபதி வழக்கு பதிவு செய்து விபத்தை ஏற்படுத்திவிட்டு தப்பித்து சென்ற மோட்டார்சைக்கிள் ஓட்டி வந்தவரை தேடி வருகிறார்.

கோபி

கோபி அருகே உள்ள கலிங்கியத்தை சேர்ந்தவர் சுப்பிரமணியம் (வயது 62.) இவர் இறைச்சி கடை நடத்தி வந்தார். சுப்பிரமணியம் கடந்த 5-ந் தேதி காலை கோபி பொலவக்காளிபாளையம் ரோட்டில் மொபட்டில் சென்று கொண்டிருந்தார். அப்போது எதிர்பாராதவிதமாக அவர் மொபட்டில் இருந்து தவறி கீழே விழுந்தார். இதில் படுகாயம் அடைந்த அவரை அக்கம்பக்கத்தினர் மீட்டு சிகிச்சைக்காக கோபி அரசு ஆஸ்பத்திரியில் சேர்த்தனர்.

பின்னர் மேல் சிகிச்சைக்காக கோவை அரசு ஆஸ்பத்திரிக்கு கொண்டு் செல்லப்பட்டார். அங்கு அவருக்கு டாக்டர்கள் தீவிர சிகிச்சை அளித்து வந்தனர். ஆனால் சிகிச்சை பலனின்றி சுப்பிரமணியம் நேற்று பரிதாபமாக இறந்தார். இதுகுறித்து கோபி போலீசார் வழக்கு பதிவு செய்து விசாரித்து வருகின்றனர்.

இறந்த சுப்பிரமணியத்துக்கு மனைவியும், ஒரு மகனும் உள்ளனர்.

அறச்சலூர்

அறச்சலூர் அருகே உள்ள கிளியம்பட்டி நல்லாந்தொழுவு தெற்கு தோட்டத்தை சேர்ந்தவர் குப்புசாமி (வயது 55). விவசாயி. இவர் நேற்று முன்தினம் தனது தோட்டத்தில் நிறுத்தப்பட்டிருந்த டிராக்டரை ஸ்டார்ட் செய்துள்ளார். அப்போது ஸ்டார்ட் ஆன டிராக்டர் நகர்ந்து எதிர்பாராதவிதமாக அருகில் இருந்த பள்ளத்தில் கவிழ்ந்து விட்டது.

இதில் இடிபாடுகளுக்குள் சிக்கி குப்புசாமி பலத்த காயம் அடைந்தார். உடனே அவரை அக்கம்பக்கத்தினர் மீட்டு சிகிச்சைக்காக தனியார் ஆம்புலன்ஸ் மூலம் ஈரோடு அரசு ஆஸ்பத்திரியில் சேர்த்தனர். அங்கு டாக்டர்கள் பரிசோதித்துவிட்டு குப்புசாமி ஏற்கனவே இறந்துவிட்டதாக தெரிவித்தனர். இதுகுறித்து அறச்சலூர் போலீஸ் இன்ஸ்பெக்டர் சண்முகசுந்தரம், சப்-இன்ஸ்பெக்டர் அரிச்சந்திரன் ஆகியோர் வழக்கு பதிவு செய்து விசாரணை நடத்தி வருகிறார்கள்.

இறந்த குப்புசாமிக்கு மனைவியும், மகனும் உள்ளனர்.

சிவகிரி

திருப்பூர் மாவட்டம் முத்தூரில் இருந்து ஈரோட்டுக்கு தனியார் பஸ் ஒன்று நேற்று சென்று கொண்டிருந்தது. இந்த பஸ் சிவகிரி அருகே விளாங்காட்டுவலசு என்ற இடத்தில் சென்றபோது அந்த வழியாக சேலம் மாவட்டத்தை சேர்ந்த ஆர்.சந்தோஷ் (வயது 24), பி.சந்தோஷ் (24) ஆகியோர் வந்த ஸ்கூட்டரும், தனியார் பஸ்சும் எதிர்பாராதவிதமாக நேருக்கு நேர் மோதிக்கொண்டன. இந்த விபத்தில் ஸ்கூட்டரில் வந்த 2 பேரும் தூக்கி வீசப்பட்டு படுகாயம் அடைந்தனர்.

இதை பார்த்த அக்கம்பக்கத்தினர் 2 பேரையும் மீட்டு் சிகிச்சைக்காக தனியார் ஆம்புலன்ஸ் மூலம் ஈரோடு அரசு ஆஸ்பத்திரிக்கு அனுப்பி வைத்தனர். அங்கு டாக்டர்கள் பரிசோதித்துவிட்டு ஆர்.சந்தோஷ் இறந்துவிட்டதாக தெரிவித்தனர். பி.சந்தோஷ் தொடர்ந்து சிகிச்சை பெற்று வருகிறார்.

இதுகுறித்து சிவகிரி போலீசார் விசாரணை நடத்தி வருகிறார்கள்.