அரியலூர் மாவட்டம், ஜெயங்கொண்டம் அருகே ஆமணக்கந்தோண்டி கிராமம் மேட்டுத்தெருவை சேர்ந்தவர் ரமேஷ்(வயது 48). விவசாயியான இவர் பொன்னேரி அருகே உள்ள தனது கடலை வயலுக்கு இரவு சாப்பாடு எடுத்துக்கொண்டு சைக்கிளில் சென்று கொண்டிருந்தார். அப்போது அவருக்கு பின்னால் வந்த கார் எதிர்பாராத விதமாக ரமேஷின் சைக்கிள் மீது மோதியது. இதில் தூக்கி வீசப்பட்ட ரமேஷ் சம்பவ இடத்திலேயே பரிதாபமாக உயிரிழந்தார். இதனை அவ்வழியாக சென்றவர்கள் பார்த்து 108 ஆம்புலன்சுக்கும், போலீசாருக்கும் தகவல் கொடுத்தனர். தகவல் அறிந்த ஜெயங்கொண்டம் போலீசார் சம்பவ இடத்திற்கு சென்று ரமேஷின் உடலை கைப்பற்றி பிரேத பரிசோதனைக்காக ஜெயங்கொண்டம் அரசு மருத்துவமனைக்கு அனுப்பி வைத்தனர். இதையடுத்து கார் டிரைவரான திருவிடைமருதூர் நடுத்தெருவை சேர்ந்த மணிகண்டன்(35) என்பவர் மீது போலீசார் வழக்குப்பதிவு செய்து விசாரணை நடத்தி வருகின்றனர்.