விவசாயி மர்ம சாவு

திருவோணம் அருகே விவசாயி மர்மமான முறையில் இறந்தார். அவர் அடித்து கொலை செய்யப்பட்டாரா? என்பது குறித்து போலீசார் தீவிர விசாரணை நடத்தி வருகின்றனர்.

சொத்து தகராறு

தஞ்சை மாவட்டம் திருவோணத்தை அடுத்துள்ள தோப்பநாயகம் கிராமத்தை சேர்ந்தவர் வேம்பையன் (வயது55). விவசாயி. இவருக்கும் இவரது தம்பி ஆறுமுகம் (48) என்பவருக்கும் இடையே சொத்து பிரச்சினை இருந்து வருகிறது. இந்த நிலையில் நேற்று முன்தினம் வேம்பையன் வாடகை டிராக்டர் எடுத்துக்கொண்டு நிலத்தை உழுவதற்காக சென்றார். அப்போது வேம்பையனுக்கும் அவரது தம்பி ஆறுமுகத்திற்கும் இடையே தகராறு ஏற்பட்டதாக கூறப்படுகிறது. இதனைத் தொடர்ந்து சற்று நேரத்தில் வேம்பையன் திடீரென மயங்கி விழுந்தார்.

இவரை அக்கம் பக்கத்தினர் மீட்டு பட்டுக்கோட்டை அரசு ஆஸ்பத்திரிக்கு சிகிச்சைக்காக அனுப்பி வைத்தனர். அங்கு வேம்பையனை பரிசோதித்த டாக்டர் அவர் ஏற்கனவே இறந்து விட்டதாக தெரிவித்தார்.

அடித்துக்கொலை செய்யப்பட்டாரா?

இதுகுறித்து வேம்பையனின் மனைவி முத்துலட்சுமி வாட்டாத்திக் கோட்டை போலீசில் புகார் செய்தார். இதனை தொடர்ந்து போலீசார் வேம்பையன் உடலை கைப்பற்றி பட்டுக்கோட்டை அரசு ஆஸ்பத்திரிக்கு பிரேத பரிசோதனைக்காக அனுப்பி வைத்தனர்.

மேலும் இதுகுறித்து சந்தேக மரணம் என போலீசார் வழக்குப்பதிவு செய்து அவர் அடித்துக்கொலை செய்யப்பட்டாரா? என்பது பற்றி விசாரித்து வருகிறார்கள்.