மதுரை ஆயுதப்படை மைதானத்தில் மயங்கி விழுந்தார்: போலீஸ் உடல் தகுதி தேர்வுக்கு பயிற்சி எடுத்தவர் திடீர் சாவு

போலீஸ் எழுத்து தேர்வில் வெற்றி பெற்று, உடல் தகுதி தேர்வுக்கு பயிற்சி எடுத்தவர் திடீரென மயங்கி விழுந்து உயிரிழந்த சம்பவம் சோகத்தை ஏற்படுத்தியது.

போலீஸ் தேர்வுக்கு பயிற்சி

விருதுநகர் மாவட்டம் சிவகாசி திருத்தங்கலை சேர்ந்தவர் முனியாண்டி. இவருடைய மகன் பாரதி (வயது 22). கடந்த ஆண்டு இவர் போலீஸ் எழுத்து தேர்வு எழுதினார். அந்த தேர்வில் வெற்றி பெற்ற பாரதி, அடுத்த கட்டமாக உடல் தகுதி தேர்வுக்கு தன்னை தயார்படுத்தி வந்தார்.

இதற்காக அவர், மதுரை ஆயுதப்படை மைதானத்திற்கு வந்து ஓட்டம் உள்ளிட்ட பல்வேறு பயிற்சிகளை எடுத்து வந்தார்.

காலையில் பயிற்சிக்கு வரும் இவர், இரவில் ஊர் திரும்பிவிட்டு, மறுநாள் காலை மீண்டும் பயிற்சிக்கு வந்துள்ளார்.

திடீர் சாவு

நேற்று காலை ஆயுதப்படை மைதானத்தில் பயிற்சி முடிந்து மதியம் சாப்பிட்டுவிட்டு மரத்தடியில் படுத்து தூங்கினார். பின்னர் எழுந்து பயிற்சி செய்த போது திடீரென்று மயங்கி விழுந்தார். உடனே அவரை அங்கிருந்தவர்கள் மீட்டு சிகிச்சைக்காக மதுரை அரசு ஆஸ்பத்திரிக்கு அனுப்பி வைத்தனர்.

அங்கு டாக்டர்கள் பரிசோதனை செய்தபோது பாரதி, ஆஸ்பத்திரிக்கு வரும் வழியிலேயே இறந்துவிட்டது தெரியவந்தது. மேலும் அவர் மாரடைப்பால் இறந்திருக்கலாம் என்று கூறப்பட்டது. இந்த சம்பவம் குறித்த தகவலின் பேரில் தல்லாகுளம் போலீசார் வழக்குப்பதிவு செய்து விசாரணை நடத்தி வருகிறார்கள்.

போலீஸ் உடற்தகுதி தேர்வுக்கான பயிற்சியின் போது மாரடைப்பால் வாலிபர் இறந்த சம்பவம் அங்கிருந்தவர்களை சோகத்தில் ஆழ்த்தியது.