விபத்தில் காயம் அடைந்த முதியவர் சாவு

திருவேங்கடம்:

கயத்தாறு அடுத்துள்ள கரடிகுளம் கிராமத்தைச் சேர்ந்தவர் கருப்பையா (வயது 89). இவர் கழுகு மலையில் ஒரு வேலை விஷயமாக தனது மோட்டார் சைக்கிளில் வந்து கொண்டு இருந்தார். பழங்கோட்டை அருகே வரும்போது பின்னால் வந்த அடையாளம் தெரியாத வாகனம் கருப்பையா மீது மோதிவிட்டு நிற்காமல் சென்று விட்டது. பலத்த காயமடைந்து உயிருக்கு போராடிக் கொண்டிருந்த கருப்பையாவை அக்கம்பக்கத்தினர் மீட்டு 108 ஆம்புலன்ஸ் மூலம் பாளையங்கோட்டை அரசு ஆஸ்பத்திரியில் சிகிச்சைக்காக சேர்த்தனர். அங்கு சிகிச்சை பலனின்றி கருப்பையா பரிதாபமாக இறந்தார். இதுபற்றி குருவிகுளம் போலீசார் வழக்குப்பதிவு செய்து விசாரணை நடத்தி வருகிறார்கள்.