மொபட் மீது வாகனம் மோதி முதியவர் பலி

கோவில்பட்டி:

கோவில்பட்டி அருகே உள்ள கார்த்திகைபட்டி கிராமத்தை சேர்ந்தவர் செல்லத்துரை (வயது 65). விவசாயி. அவருடைய மனைவி பார்வதி (62). இவர்கள் இருவரும் நேற்று அதிகாலை 5 மணிக்கு கார்த்திகைபட்டியில் இருந்து மொபட்டில் கோவில்பட்டிக்கு சென்று கொண்டிருந்தனர். கெச்சிலாபுரம் விலக்கு அருகே சென்றபோது எதிரே வந்த அடையாளம் தெரியாத வாகனம் மோதி விட்டு நிற்காமல் சென்று விட்டது. இதனால் இருவரும் தூக்கி வீசப்பட்டனர். இதில் சம்பவ இடத்திலேயே செல்லத்துரை பரிதாபமாக இறந்தார். பார்வதி படுகாயம் அடைந்தார்.

தகவல் அறிந்ததும் மேற்கு போலீஸ் இன்ஸ்பெக்டர் கிங்ஸ்லி தேவானந்த், சப்-இன்ஸ்பெக்டர் ஹரி கண்ணன் ஆகியோர் சம்பவ இடத்துக்கு சென்றனர். அவரது உடலை கைப்பற்றி பிரேத பரிசோதனைக்காக கோவில்பட்டி அரசு ஆஸ்பத்திரிக்கு அனுப்பி வைத்தனர். காயம் அடைந்த பார்வதிக்கு கோவில்பட்டி அரசு ஆஸ்பத்திரியில் சிகிச்சை அளிக்கப்பட்டு, மேல் சிகிச்சைக்காக பாளையங்கோட்டை ஐகிரவுண்டு அரசு மருத்துவமனைக்கு அனுப்பி வைத்தனர். இதுகுறித்து போலீசார் வழக்குப்பதிவு செய்து அடையாளம் தெரியாத அந்த வாகனத்தை தேடி வருகின்றனர்.