பண்டரிநாதன் பஜனை மடத்தில் பக்தர்கள் வழிபாடு

ஆஷாட ஏகாதசி விழா

கரூர் ஜவகர்பஜார் அருகே பிரசித்தி பெற்ற பண்டரிநாதன் பஜனை மடம் உள்ளது. இங்கு ஆண்டுதோறும் பூலோக சொர்க்க திருநாள் என அழைக்கப்படும் ஆஷாட ஏகாதசி நாளில் மூலவரை கருவறைக்குள் சென்று பக்தர்கள் தொட்டு வழிபடும் நிகழ்ச்சி நடைபெறும். அந்த வகையில் இந்த ஆண்டு  பண்டரிநாதன் பஜனை மடத்தில் ஆஷாட ஏகாதசி விழா நடைபெற்றது. இதையொட்டி காலை 6 மணியளவில் ரகுமாய் சமேத பண்டரிநாதருக்கு பால், பன்னீர், தேன், பஞ்சாமிர்தம், மஞ்சள், இளநீர் உள்பட பல்வேறு வாசனை திரவியங்களால் சிறப்பு அபிஷேகம் செய்யப்பட்டு அலங்காரம் செய்யப்பட்டது.தொடர்ந்து மகாதீபாராதனை காட்டப்பட்டது. இதனைத்தொடர்ந்து பக்தர்கள் பண்டரிநாதருக்கு துளசி மாலையை அணிவித்து கருவறைக்குள் சென்று சுவாமியை பாதம் தொட்டு மனமுருகி வணங்கி சென்றனர். இதில் ஆண்கள் மேல்சட்டை அணியாமல் சென்று வழிபாடு நடத்தினர். அந்த சமயத்தில் வெளிப்புற மண்டபத்தில் உற்சவர் பூக்களால் அலங்கரிக்கப்பட்டு பக்தர்களுக்கு அருள்பாலித்தார்.

தீர்த்தவாரி

ஆஷாட ஏகாதசி நாளில் பண்டரிநாதரை வழிபட்டால் சகல துன்பங்களும் நீங்கி வாழ்க்கையில் தெளிவு கிடைக்கும். எல்லாவித செல்வங்களும் கிடைக்கப்பெற்று முன்னேற்ற பாதையை நோக்கி செல்வதற்கு வழிபிறக்கும் என்பது ஐதீகமாக கருப்படுகிறது.இந்த நிகழ்ச்சியில் கரூர், செங்குந்தபுரம், திருமாநிலையூர், வெங்கமேடு, பசுபதிபாளையம், செல்லாண்டிபாளையம் உள்ளிட்ட பகுதியை சேர்ந்த பக்தர்கள் பலர் கலந்து கொண்டு சாமி தரிசனம் செய்தனர். பின்னர் பக்தர்களுக்கு பிரசாதம் வழங்கப்பட்டது. மாலை சுவாமி திருவீதி உலா நடைபெற்றது. இன்று (திங்கட்கிழமை) காலை 6 மணியளவில் காவிரி ஆற்றில் பண்டரிநாதன் சுவாமிக்கு தீர்த்தவாரி நடக்கிறது.