குளத்தில் தவறி விழுந்து பெண் சாவு

ஓசூர்

ஓசூரில் குளத்தில் தவறி விழுந்து பெண் பரிதாபமாக இறந்தார்.

குளத்தில் தவறி விழுந்தார்

ஓசூர் ஆவலப்பள்ளி சாலையில் உள்ள முனிதேவி நகரை சேர்ந்தவர் வெங்கடாசலம். இவரது மனைவி விஜயா (வயது 40). இவருக்கு குழந்தைகள் உள்ளனர். இதனிடையே விஜயாவுக்கு உடல் நலம் பாதிக்கப்பட்டது. அதற்காக அவர் அரசு மற்றும் தனியார் மருத்துவமனைகளில் சிகிச்சை பெற்று வந்தார்.

சம்பவத்தன்று இரவு வீட்டில் இருந்து வெளியே சென்ற அவர் தேர்பேட்டை பச்சை குளம் அருகே அமர்ந்து இருந்தார். அப்போது, விஜயா எதிர்பாராதவிதமாக குளத்தில் தவறி விழுந்தார். இதையடுத்து தண்ணீரில் மூழ்கிய அவரை அருகில் இருந்தவர்கள் மீட்டு கிருஷ்ணகிரி அரசு மருத்துவ கல்லூரி மருத்துவமனையில் சேர்த்தனர்.

சாவு

ஆனால் அங்கு தீவிர சிகிச்சை அளித்தும் பலனின்றி நேற்று முன்தினம் விஜயா பரிதாபமாக இறந்தார். இதுகுறித்து ஓசூர் டவுன் போலீசாருக்கு தகவல் தெரிவிக்கப்பட்டது. அதன் பேரில் போலீசார் விரைந்து சென்று விஜயாவின் உடலை பிரேத பரிசோதனை செய்து குடும்பத்தினரிடம் ஒப்படைத்தனர். இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர். குளத்தில் தவறி விழுந்து பெண் இறந்த சம்பவம் அந்த பகுதியில் சோகத்தை ஏற்படுத்தியது.