உத்தனப்பள்ளி அருகேமோட்டார் சைக்கிள் மீது லாரி மோதி பாலிடெக்னிக் மாணவர் சாவு

ராயக்கோட்டை

உத்தனப்பள்ளி அருகே மோட்டார்சைக்கிள் மீது லாரி மோதிய விபத்தில் பாலிடெக்னிக் மாணவர் பலியானார்.

பாலிடெக்னிக் மாணவர்

கிருஷ்ணகிரி மாவட்டம் உத்தனப்பள்ளி அருகே உள்ள பீர்ஜேப்பள்ளியை சேர்ந்தவர் முருகேசன். இவரது மகன் கார்த்திகேயன் (வயது 20). இவர் கோனேரிப்பள்ளியில் உள்ள தனியார் பாலிடெக்னிக் கலலூரியில் 3-ம் ஆண்டு படித்து வந்தார். இவர் நேற்று முன்தினம் பேகேப்பள்ளி-உத்தனப்பள்ளி சாலையில் மோட்டார்சைக்கிளில் சென்று கொண்டு இருந்தார்.

அப்போது அந்த வழியாக வந்த லாரி மோட்டார் சைக்கிள் மீது மோதியது. இந்த விபத்தில் மாணவர் கார்த்திகேயன் பலத்த காயமடைந்து சம்பவ இடத்திலேயே பரிதாபமாக இறந்தார். இந்த விபத்து குறித்து உத்தனப்பள்ளி போலீசாருக்கு தகவல் தெரிவிக்கப்பட்டது.

போலீசார் விசாரணை

அதன் பேரில் போலீஸ்சப்-இன்ஸ்பெக்டர் குமுதா மற்றும் போலீசார் சம்பவ இடத்திற்கு சென்று விபத்தில் இறந்த கார்த்திகேயனின் உடலை மீட்டு பிரேத பிசோதனைக்காக ஓசூர் அரசு ஆஸ்பத்திரிக்கு அனுப்பி வைத்தனர். இந்த விபத்து குறித்து போலீசார் வழக்குப்பதிவு செய்து விசாரணை நடத்தி வருகிறார்கள். லாரி மோதி பாலிடெக்னிக் மாணவர் இறந்த சம்பவம் அந்த பகுதியில் சோகத்தை ஏற்படுத்தியது.