நல்லம்பள்ளி அருகே ரெயிலில் அடிபட்டு என்ஜினீயரிங் கல்லூரி மாணவர் பலி

தர்மபுரி:

தர்மபுரி மாவட்டம் நல்லம்பள்ளி அருகே உள்ள தேவரசம்பட்டியை சேர்ந்தவர் சங்கர். இவருடைய மகன் அஜய்குமார். இவர் ஒரு தனியார் என்ஜினீயரிங் கல்லூரியில் முதலாம் ஆண்டு படித்து வந்தார். இந்தநிலையில் அஜய்குமார் நேற்று தேவரசம்பட்டியில் தண்டவாளத்தை கடக்க முயன்றதாக கூறப்படுகிறது. அப்போது அந்த வழியாக சென்ற ரெயிலில் அடிபட்டு அவர் பரிதாபமாக இறந்தார். இதுகுறித்து தகவல் அறிந்த தர்மபுரி ரெயில்வே போலீசார் அங்கு விரைந்து சென்றனர். அவர்கள் அஜய்குமார் உடலை கைப்பற்றி பிரேத பரிசோதனைக்காக தர்மபுரி அரசு ஆஸ்பத்திரிக்கு அனுப்பி வைத்தனர். மேலும் இதுதொடர்பாக போலீசார் வழக்குப்பதிவு செய்து விசாரணை நடத்தி வருகிறார்கள்.