தர்மபுரியில் தண்டவாளத்தை கடக்க முயன்றவர் ரெயில் மோதி பலி

தர்மபுரி:

தர்மபுரி பாரதிபுரம் பகுதியில் நேற்று மாலை காரைக்கால் பயணிகள் ரெயில் வந்து கொண்டிருந்தது. அப்போது அந்த பகுதியில் தண்டவாளத்தை கடக்க முயன்ற 45 வயது மதிக்கத்தக்க ஆண் மீது ரெயில் மோதியது. இதில் பலத்த காயம் அடைந்த அவர் சம்பவ இடத்திலேயே பலியானார். இதுகுறித்து தகவல் அறிந்த தர்மபுரி ரெயில்வே போலீசார் சம்பவ இடத்திற்கு சென்று உடலை கைப்பற்றி அரசு ஆஸ்பத்திரிக்கு அனுப்பி வைத்தனர். இறந்தவர் யார்? எந்த ஊரை சேர்ந்தவர்? என்ற விவரங்கள் உடனடியாக தெரியவில்லை. இதுதொடர்பாக ரெயில்வே போலீசார் வழக்குப்பதிவு செய்து விசாரணை நடத்தி வருகிறார்கள்.