சுற்றித்திரியும் மாடுகளால் விபத்து ஏற்படும் அபாயம்

அதிராம்பட்டினம்

அதிராம்பட்டினம் கிழக்கு கடற்கரை சாலையில் சுற்றித்திரியும் மாடுகளால் விபத்து ஏற்படும் அபாயம் உள்ளது. எனவே அதிகாரிகள் நடவடிக்கை எடுக்க வேண்டும் என வாகன ஓட்டிகள் கோரிக்கை விடுத்துள்ளனர்.

போக்குவரத்துக்கு இடையூறாக மாடுகள்

தஞ்சை மாவட்டம் அதிராம்பட்டினம் கிழக்கு கடற்கரை சாலை பிரதான போக்குவரத்து சாலையாக இருந்து வருகிறது. இந்த சாலையில் பகல் மற்றும் இரவு நேரங்களிலும் தினமும் ஆயிரக்கணக்கான வாகனங்கள் சென்று வருகின்றன. நாகப்பட்டினம், வேளாங்கண்ணி, திருச்சி, ராமநாதபுரம், திருச்செந்தூர், போன்ற பகுதிகளுக்கு வாகனங்கள் அடிக்கடி சென்று வருகின்றன. போக்குவரத்து மிகுந்த இந்த சாலையில் தினமும் 30-க்கும் மேற்பட்ட மாடுகள் சுற்றித்திரிகின்றன.

நடவடிக்கை

அப்போது மாடுகள் சாலையின் குறுக்கே போக்குவரத்துக்கு இடையூறாக காணப்படுகிறது. இதனால் வாகன ஓட்டிகள் விபத்தில் சிக்கி காயமடைகின்றனர். மேலும் அடிக்கடி விபத்து ஏற்படும் அபாயம் உள்ளது. எனவே விபத்து ஏற்படும் முன்பு சாலையில் சுற்றித்திரியும் மாடுகளை அப்புறப்படுத்த சம்பந்தப்பட்ட அதிகாரிகள் நடவடிக்கை எடுக்க வேண்டும் என்று வாகன ஓட்டிகள் கோரிக்கை விடுத்துள்ளனர்.