அக்கரைப்பட்டியில் ரூ.16 லட்சத்துக்கு பருத்தி ஏலம்

ராசிபுரம்:

ராசிபுரம் அருகே உள்ள அக்கரைப்பட்டியில் பருத்தி ஏலம் நடந்தது. மல்லசமுத்திரம், வையப்பமலை, பெரிய மணலி, சின்ன மணலி, மதியம்பட்டி, அக்கரைப்பட்டி, மின்னாம்பள்ளி, சவுதாபுரம், நாட்டாமங்கலம், எலச்சிபாளையம், கோக்கலை உள்பட சுற்று வட்டார கிராமங்களை சேர்ந்த விவசாயிகள் தாங்கள் விளைவித்த பருத்தியை ஏலத்திற்கு கொண்டு வந்திருந்தனர். சேலம், ஆத்தூர், ராசிபுரம், அவிநாசி உள்பட பல்வேறு பகுதிகளை சேர்ந்த வியாபாரிகள் கலந்து கொண்டு பருத்தியை ஏலத்தில் எடுத்தனர். இதில் சுரபி ரக பருத்தி ஒரு குவிண்டால் ரூ.8 ஆயிரத்து 569 முதல் ரூ.10 ஆயிரத்து 999 வரை ஏலம் போனது. மொத்தம் 516 மூட்டை பருத்தி ரூ.16 லட்சத்துக்கு விற்பனையானது.