சோளிங்கர் ரெயில் நிலையத்தில் 45 மூட்டை ரேஷன் அரிசி பறிமுதல்

அரக்கோணம் ரெயில் நிலையம் வழியாக வெளி மாநிலங்களுக்கு செல்லும் ரெயில்களில் ரேஷன் அரிசி கடத்துவதை தடுக்கும் வகையில் அரக்கோணம் ரெயில்வே பாதுகாப்பு படை போலீசார் ரோந்து பணியில் ஈடுபடடு, ரெயில்களில் சோதனை செய்து வந்தனர். இந்தநிலையில் சோளிங்கர் ரெயில் நிலையத்தில் இருந்து ரேஷன் அரிசி கடத்தப்படுவதாக அரக்கோணம் ரெயில்வே பாதுகாப்பு படை போலீஸ் இன்ஸ்பெக்டர் உஸ்மான் ஷெரிப்புக்கு ரகசிய தகவல் கிடைத்தது.

அதன் பேரில் இன்ஸ்பெக்டர் உஸ்மான் ஷெரிப் தலைமையில் சப்- இன்ஸ்பெக்டர் வின்சன்ட் மற்றும் போலீசார் நேற்று முன்தினம் இரவு சோளிங்கர் ரெயில் நிலையத்தில் திடீரென சோதனையில் ஈடுபட்டனர். அப்போது ரெயில்வே பிளாட் பாரத்தில் சுமார் 1,750 கிலோ ரேஷன் அரிசி 45 மூட்டைகளில் அடுக்கி வைத்திருந்ததை கண்டுபிடித்தனர்.

ரெயிலில் கடத்தப்பட இருந்த 45 மூட்டை ரேஷன் அரிசியை போலீசார் பறிமுதல் செய்து அரக்கோணம் வட்ட வழங்கல் அலுவலர் பரமேஸ்வரியிடம் ஒப்படைத்தனர்.