மோட்டார் சைக்கிள்கள் மோதல்; 3 பேர் படுகாயம்

சிவகிரி:

திருப்பூர் மாவட்டம் உடுமலைப்பேட்டை மருதூர்பட்டி மண்டபம் தெருவை சேர்ந்த காளியப்பன் மகன் மாரிமுத்து (வயது 43). இதே பகுதியைச் சேர்ந்த முனியாண்டி (57), இவரது மகன் பெரியநாயகம் (42). இவர்கள் 3 பேரும் சிவகிரி அருகே ராமநாதபுரம் பகுதியில் தனியார் ஆலையில் வேலை செய்து வருகிறார்கள்.

ேநற்று முன்தினம் முகவூர்- தளவாய்புரத்தில் மளிகை பொருட்கள் வாங்குவதற்காக தென்காசி-மதுரை தேசிய நெடுஞ்சாலையில் ஒரே மோட்டார் சைக்கிளில் 3 பேரும் சென்றனர். மோட்டார் சைக்கிளை மாரிமுத்து ஓட்டினார். அப்போது, எதிரே மேலக்கடையநல்லூரைச் சேர்ந்த விக்னேஷ் (32) என்பவர் மற்றொரு மோட்டார் சைக்கிளில் வந்தார். கண் இமைக்கும் நேரத்தில் 2 மோட்டார் சைக்கிள்களும் மோதிக் கொண்டன. இதில் மாரிமுத்து, பெரியநாயகம், முனியாண்டி ஆகியோர் தூக்கி வீசப்பட்டு பலத்த காயம் அடைந்தனர். இதுகுறித்து தகவல் அறிந்த சிவகிரி போலீசார் விரைந்து சென்று 3 பேரையும் மீட்டு சிகிச்சைக்காக ஆஸ்பத்திரிக்கு அனுப்பி வைத்தனர்.