தேங்காய் பூ விற்பனை அமோகம்

ராமநாதபுரத்தில் மருத்துவ குணம் மிகுந்த ஆந்திர மாநில வரவான தேங்காய் பூ விற்பனை அமோகமாக நடைபெற்று வருகிறது.

தேங்காய் பூ விற்பனை

ராமநாதபுரம் மாவட்டத்தில் வெயிலின் தாக்கம் குறைந்து மழை பெய்து வருகிறது. இந்தநிலையில் மாவட்டம் முழுவதும் தற்போது அதிக அளவில் தேங்காய் பூ விற்பனை அதிகரித்துள்ளது. ராமநாதபுரம் மாவட்டம் முழுவதும் சாலை ஓரங்களில் 50-க்கும் மேற்பட்ட இடங்களில் தேங்காய் பூ விற்பனை நடந்து வருகிறது. இந்த தேங்காய் பூக்களை வியாபாரிகள் உடைத்து பார்வைக்கு வைத்து விற்பனை செய்து வருகின்றனர். உடலுக்கு குளிர்ச்சியும் தேவையான சத்துக்களையும் தரும் தேங்காய்பூ விற்பனை நடைபெற்று வருகிறது.

இதுகுறித்து தேங்காய் பூ வியாபாரி அண்ணாத்துரை கூறியதாவது:- ஆந்திராவில் இருந்து இந்த தேங்காய் பூக்களை வாங்கி வந்து விற்பனை செய்து வருகிறோம். இந்த தேங்காய் பூ, 3 மாத பயிராக பதியம் முறையில் விளைவிக்கப்படுகிறது. 3 மாதங்களுக்குள் எடுத்துவிட வேண்டும். இல்லாவிட்டால் பூ முற்றி மரமாக வளர தொடங்கி விடும். 1 தேங்காயில் 150 முதல் 200 கிராம் வரை பூ இருக்கும். இந்த பூ வை நாங்கள் ரூ.100 முதல் 120 வரை விற்பனை செய்து வருகிறோம்.

மருத்துவ குணம்

இனிப்பு சுவையாக, பஞ்சு போல் இருக்கும் இந்த தேங்காய் பூவை உண்பதால், வாய் மற்றும் வயிற்றுப்புண் குணமாவதோடு உடலுக்கு குளிர்ச்சி கிடைக்கிறது. கர்ப்பப்பை கோளாறுகள் உள்ளிட்ட பெண்களுக்கான உடல் உபாதைகள் நீங்குவதாக கூறப்படுகிறது. குறிப்பாக வயிற்றுப்புண் குணமாவதால் அதன் பாதிப்பு உள்ளவர்கள் இந்த தேங்காய் பூவை விரும்பி வாங்கி சென்று சாப்பிட்டு வருகின்றனர். இளநீரில் உள்ள அனைத்து சத்துக்களும் கூட்டப்பட்டு இருப்பதோடு அதிக மருத்துவ குணங்களுடன் உடலுக்கு தேவையான எதிர்ப்பு சக்தியையும், குளிர்ச்சியையும் தருவதால் இளநீரை விட அதிக விலை போகிறது.

தேங்காய் தண்ணீரிலும், இளநீரிலும் எவ்வளவு ஊட்டச்சத்துகள் இருக்கிறதோ அதைவிட மிக அதிக அளவிலான ஊட்டச்சத்துகள் இந்த தேங்காய் பூவில் உண்டு என்று மக்கள் நம்புகின்றனர். நல்ல சுவையாக இருப்பதாலும் மருத்துவ குணமுள்ள உணவுப்பொருள் என்பதாலும் பலரும் இதை விரும்பி வாங்குகின்றனர். இதனால் ஆந்திராவில் இருந்து வாங்கி வந்து விற்பனை செய்கிறோம்.