குன்னம் குறுவட்ட அளவிலான விளையாட்டு போட்டிகளில் செட்டிகுளம் அரசு மேல்நிலைப்பள்ளி சாதனை

பெரம்பலூர் மாவட்ட பள்ளிக்கல்வித்துறை சார்பில் குடியரசு தின விழாவையொட்டி குன்னம் குறுவட்ட அளவிலான பள்ளி மாணவ-மாணவிகளுக்கான விளையாட்டு போட்டிகள் சமீபத்தில் நடந்து முடிந்தது. இதில் வேப்பூர் கல்வி மாவட்டத்துக்குட்பட்ட செட்டிகுளம் அரசு மேல்நிலைப்பள்ளியின் 14 வயதிற்குட்பட்ட மாணவ-மாணவிகள் அணிகள் கபடி போட்டியிலும், 19 வயதுக்குட்பட்ட மாணவர்கள் அணியினர் கபடி போட்டியிலும் முதலிடம் பிடித்தனர். 17 வயதுக்குட்பட்ட மாணவர்களுக்கான எறிபந்து போட்டியில் 2-வது இடமும், 19 வயதுக்குட்பட்ட மாணவிகளுக்கான கூடைப்பந்து போட்டியில் 2-வது இடமும், டேபிள் டென்னிஸ் போட்டியில் 2-வது இடமும் பிடித்தனர். தடகள போட்டியில் செட்டிகுளம் அரசு மேல்நிலைப்பள்ளி மாணவ-மாணவிகள் இணைந்து 18 தங்கம், 12 வெள்ளி, 8 வெண்கலம் என மொத்தம் 38 பதக்கங்களை பெற்று சாம்பியன் பட்டத்தை தட்டி சென்றனர். இதில் மாணவிகள் கீர்த்தனா, கார்த்திகா ஆகிய 2 பேரும் தனி நபர் சாம்பியன் பட்டத்தை பெற்று சாதனை படைத்தனர். குன்னம் குறுவட்ட அளவில் விளையாட்டு போட்டிகளில் வெற்றி பெற்று செட்டிகுளம் அரசு மேல்நிலைப்பள்ளிக்கு பெருமை சேர்ந்த மாணவ-மாணவிகளையும், அவர்களுக்கு பயிற்சி அளித்த உடற்கல்வி ஆசிரியர்கள் மணி, அறிவழகன், ஏகாம்பரம் ஆகியோர்களை பள்ளியின் தலைமை ஆசிரியர் (பொறுப்பு) பொன்னுத்துரை, உதவி தலைமை ஆசிரியர் கலியமூர்த்தி, தொழிற்கல்வி ஆசிரியர் ராதாகிருஷ்ணன் மற்றும் ஆசிரியர்கள் பாராட்டினர்.