பள்ளத்தில் கார் கவிழ்ந்து பெண் பலி

நாங்குநேரி:

குமரி மாவட்டம் நாகர்கோவிலை சேர்ந்தவர் காதர் (வயது 44). இவர் ஓட்டல் நடத்தி வருகிறார். இவர் தனது மனைவி பவினா (42), மகன்கள் அப்ரா (21), அப்துல்லா கான் (19) ஆகியோருடன் நேற்று முன்தினம் நெல்லையில் உள்ள தியேட்டரில் படம் பார்க்க வந்தார்.

அவர்கள் படம் பார்த்து விட்டு இரவில் நாகர்கோவிலுக்கு காரில் திரும்பி சென்று கொண்டிருந்தனர். காரை அப்துல்லா கான் ஓட்டினார்.

கார் கவிழ்ந்தது

நாங்குநேரி சுங்கச்சாவடி அருகே சென்றபோது கார் திடீரென டிரைவரின் கட்டுப்பாட்டை இழந்து ஓடி சாலையோரத்தில் உள்ள பள்ளத்தில் கவிழ்ந்தது. இதில் காரில் இருந்த பவினா உள்பட 4 பேரும் படுகாயம் அடைந்தனர்.

தகவல் அறிந்த நாங்குநேரி போலீசார் அங்கு விரைந்து வந்து, படுகாயம் அடைந்தவர்களை மீட்டு ஆம்புலன்ஸ் மூலம் பாளையங்கோட்டை ஐகிரவுண்டு அரசு ஆஸ்பத்திரியில் சேர்த்தனர். அங்கு சிகிச்சை பலனின்றி பவினா பரிதாபமாக இறந்தார். மற்ற 3 பேருக்கும் சிகிச்சை அளிக்கப்பட்டு வருகிறது.

இந்த விபத்து குறித்து போலீசார் வழக்குப்பதிவு செய்து விசாரணை நடத்தி வருகின்றனர். சினிமா பார்த்து விட்டு வீட்டுக்கு திரும்பியபோது கார் கவிழ்ந்த விபத்தில் பெண் பலியான சம்பவம் சோகத்தை ஏற்படுத்தி உள்ளது.