வீட்டின் ஜன்னலை உடைத்து 15 பவுன் நகை திருட்டு

15 பவுன் நகை-பணம் திருட்டு

புதுக்கோட்டை மாவட்டம், திருமயம் அருகே ஆம்மினிபட்டி ஜென்னிஸ் கார்டன் பகுதியை சேர்ந்தவர் மெய்யப்பன் மகன் ராஜா (வயது 31). இவர் நேற்று வீட்டை பூட்டி விட்டு தனது குடும்பத்தினருடன் புதுக்கோட்டை சென்றிருந்தார். பின்னர் வீட்டிற்கு வந்து பார்த்த போது, வீட்டின் கதவு திறந்து கிடந்தது. இதனால் அதிர்ச்சி அடைந்த ராஜா வீட்டின் உள்ளே சென்று பார்த்தபோது வீட்டின் பக்கவாட்டு ஜன்னல் கதவு உடைக்கப்பட்டு இருந்தது. பின்னர் அவர் வீட்டிற்குள் சென்று பார்த்த போது, பீரோவில் இருந்த 15 பவுன் தங்க நகைகள் மற்றும் ரூ.40 ஆயிரத்தையும் மர்ம நபர்கள் திருடி சென்றது தெரியவந்தது.

வலைவீச்சு

இதுகுறித்து தகவல் அறிந்த நமணசமுத்திரம் போலீசார் சம்பவ இடத்திற்கு விரைந்து வந்து விசாரணை நடத்தினர். விசாரணையில் ஜன்னல் கதவை உடைத்து அதன் வழியாக கதவை திறந்து மர்மநபர்கள் உள்ளே சென்று நகை-பணத்தை திருடி சென்றது தெரியவந்தது.

இதுகுறித்து நமணசமுத்திரம் போலீஸ் நிலையத்தில் ராஜா புகார் கொடுத்தார். புகாரின் பேரில், போலீசார் வழக்குப்பதிவு செய்தனர். மேலும் நகை-பணத்தை திருடி சென்ற மர்மநபர்களை போலீசார் வலைவீசி தேடி வருகின்றனர்.